न्यूनतम सेवा मापदण्डमा ढोला स्वास्थ्य चौकी जिल्लाकै उत्कृष्ट

धादिङ,१३ असार
जिल्ला जनस्वास्थ्य कार्यालय धादिङले आर्थिक वर्ष २०८२÷०८३ अन्तर्गत स्थानीय तहका स्वास्थ्य संस्थाहरूको न्यूनतम सेवा मापदण्ड (एमएसएस) कार्यक्रमको वार्षिक समीक्षा सम्पन्न गर्दै उत्कृष्ट स्वास्थ्य संस्थालाई सम्मान गरेको छ। समीक्षा कार्यक्रम असार ११ र १२ गते जिल्ला जनस्वास्थ्य कार्यालयमा आयोजना गरिएको हो।मूल्याङ्कनका आधारमा ज्वालामुखी गाउँपालिकाको ढोला स्वास्थ्य चौकी ९६ प्रतिशत अंकसहित प्रथम, थाक्रे गाउँपालिकाको महादेवबेसी स्वास्थ्य चौकी र बेनीघाट रोराङ गाउँपालिकाको जोगिमारा स्वास्थ्य चौकी समान ९३ प्रतिशत अंकसहित द्वितीय तथा नीलकण्ठ नगरपालिकाको मुरलीभञ्ज्याङ स्वास्थ्य चौकी ९२ प्रतिशत अंकसहित तृतीय भएका छन्।

उत्कृष्ट स्वास्थ्य चौकीलाई सम्मानपत्र तथा सबै स्थानीय तहलाई प्रशंसापत्र प्रदान गरिएको थियो।कार्यक्रमका प्रमुख अतिथि जिल्ला समन्वय समिति धादिङका प्रमुख नवराज अधिकारीले स्वास्थ्य क्षेत्रको गुणस्तर सुधारका लागि प्रतिस्पर्धात्मक अभ्यास आवश्यक रहेको बताउँदै उत्कृष्ट स्वास्थ्य संस्थाको अनुभवबाट अन्य संस्थाले पनि सिक्नुपर्ने धारणा राख्नुभयो। उहाँले स्वास्थ्य, शिक्षा र प्राविधिक क्षेत्रको सुधारले समग्र समाजको विकास सम्भव हुने उल्लेख गर्नुभयो।जिल्ला जनस्वास्थ्य कार्यालयका प्रमुख अर्जुन पौडेलले सबै १३ स्थानीय तहको सक्रियताले एमएसएसको समग्र नतिजा अघिल्लो वर्षको तुलनामा सुधार भएको जानकारी दिनुभयो।

उहाँले आगामी वर्ष सबै स्वास्थ्य संस्थामा नियमित मूल्याङ्कन गरी सेवा गुणस्तर थप अभिवृद्धि गरिने बताउनुभयो।कार्यक्रममा ज्वालामुखी गाउँपालिकाकी निमित्त प्रमुख प्रशासकीय अधिकृत अनिता छत्कुली थापा र बेनीघाट रोराङ गाउँपालिकाका स्वास्थ्य शाखा प्रमुख रमेश अर्यालले न्यून जनशक्ति, भौगोलिक चुनौती र सीमित पूर्वाधारका बाबजुद स्वास्थ्यकर्मीको मेहनतले सेवा प्रवाहमा उल्लेखनीय सुधार भएको अनुभव सुनाउँदै एमएसएसले स्थानीय सरकारलाई स्वास्थ्य व्यवस्थापन थप प्रभावकारी बनाउन सहयोग पुगेको धारणा व्यक्त गर्नुभयो।समीक्षामा स्वास्थ्य संस्थाको सेवा प्रवाह, व्यवस्थापन, अभिलेखीकरण, औषधि व्यवस्थापन, सरसफाइ तथा सुशासनलगायतका सूचकका आधारमा मूल्याङ्कन गरिएको जिल्ला जनस्वास्थ्य कार्यालयले जनाएको छ।