सेवा प्रवाहलाई नागरिकमैत्री र भ्रष्टाचाररहित बनाउने धादिङकी प्रजिअ पाण्डेको प्रतिबद्धता

धादिङबेशी,२७ जेष्ठ । धादिङमा भर्खरै सरुवा भएर आउनुभएकी प्रमुख जिल्ला अधिकारी लक्ष्मी पाण्डेले जिल्लाको सेवा प्रवाहलाई चुस्त, नागरिकमैत्री, निष्पक्ष र भ्रष्टाचाररहित बनाउने प्रतिबद्धता व्यक्त गर्नुभएको छ । मंगलबार सञ्चारकर्मीहरूसँगको परिचयात्मक कार्यक्रममा बोल्दै उहाँले जिल्ला प्रशासन कार्यालय लगायत सम्पूर्ण सरकारी र सुरक्षा निकायको कामकारबाही सुधार्न पत्रकारहरूको रचनात्मक सुझावको अपेक्षा गरेको बताउनुभयो ।

जिल्लाको भौगोलिक अवस्था र व्यावसायिक संवेदनशीलतालाई औँल्याउँदै प्रजिअ पाण्डेले बजार, यातायात, नदीजन्य पदार्थ र क्रसर उद्योगहरूमा संयुक्त अनुगमन गरिने जानकारी दिनुभयो । गुनासो आएका स्थानमा सुरक्षा निकाय र सरोकारवालाहरूसँगको सहकार्यमा तत्काल अनुगमन टोली परिचालन गरिने उहाँको भनाइ छ । साथै, जिल्लाको समग्र विकास निर्माण र शान्ति सुरक्षा कायम गर्नका लागि अधिकार र स्रोतसाधन सम्पन्न स्थानीय तहहरूसँग प्रशासनले निरन्तर समन्वयकारी भूमिका निर्वाह गर्ने उहाँले स्पष्ट पार्नुभयो ।

धादिङका पत्रकारहरु संग पहिलो पटक अन्तक्र्रिया गर्दे प्रजिअ पाण्डेले सूचना प्रवाह र प्रशासनिक सहजीकरणका लागि आफु प्रतिवद्ध रहेको बताउनु भयो । जिल्ला स्थित सरकारी कार्यालयको सेवा प्रवाहलाई चुस्त–दुरुस्त, भ्रष्टाचाररहित, निष्पक्ष र नागरिकमैत्री बनाउन सरोकारवाला निकायहरु संग समन्वय गरेर अगाडी बढ्ने उहाँको धारणा थियो ।