खनियाबासको दार्खामा सम्पन्न निशुल्क स्वास्थ्य शिविरबाट ७७७ जनाले पाए स्वास्थ्य सेवा

धादिङ,२८ मंसिर
उत्तरी धादिङको खनियाबास गाउँपालिका स्थित दार्खामा सम्पन्न भएको निशुल्क स्वास्थ्य शिविरमा ७७७ जना लाभान्वित भएका छन्। दुरदराजका नागरिकहरुलाई गाउमै विशेषज्ञ सेवा प्रवाह गर्ने उदेश्यले सन्चालन भएको शिविरमा खनियाबास गाउँपालिका लगायत छिमेकी गाउँपालिकाका नागरिकहरु लाभान्वित भएका छन् । अन्तर्राष्ट्रिय धादिङ समाजको आयोजना,धादिङ समाज अमेरिकाको सहकार्य,धादिङ समाज बेल्जियमको बिशेष सहयोग तथा मनमोहन मेमोरियल मेडिकल कलेज तथा शिक्षण अस्पतालको प्राविधिक सहयोगमा मंसिर २६ र २७ गते निशुल्क शिविर सम्पन्न भएको हो । स्थानीय सहयोगमा खनियाबास गाउँपालिका र डिपिन धादिङ रहेको छ ।

खनियाबास ग्रामीण अस्पतालको परिसरमा सञ्चालन गरिएको उक्त शिविरबाट कुल ७७७ जना स्थानीय बासिन्दाले विभिन्न स्वास्थ्य सेवा प्राप्त गरेका छन्।दुर्गम तथा आर्थिक रूपमा कमजोर नागरिकहरूलाई लक्षित गरी शिविरको आयोजना गरीएको अन्तराष्ट्रिय धादिङ समाजका अध्यक्ष राजन खकुरालले जानकारी दिनुभयो ।सहज र निःशुल्क रूपमा गुणस्तरीय स्वास्थ्य सेवा उपलब्ध गराउने उद्देश्यसहित सञ्चालन गरिएको शिविरमा जनरल फिजिसियन, महिला रोग विशेषज्ञ, डेन्टल रोग विशेषज्ञ तथा हाड–जोर्नी विशेषज्ञसहितका चिकित्सकहरूको टोलीले निरन्तर परामर्श तथा उपचार सेवा प्रदान गरेको थियो।

अन्तर्राष्ट्रिय धादिङ समाजका सल्लाहकार एवम् डिपिन धादिङका अध्यक्ष डा. प्रताप छत्कुलीका अनुसार शिविरको सेवा मंसिर २६ गते बिहान १० बजेदेखि दिउँसो ५ बजेसम्म र मंसिर २७ गते दिउँसो १ बजेसम्म सञ्चालन गरिएको थियो। शिविरमा स्वास्थ्य परीक्षण, परामर्श, औषधि वितरण तथा आवश्यक परेमा थप उपचारका लागि सिफारिससमेत गरिएको आयोजकले जनाएको छ।शिविरमा महिला सम्बन्धी १७० जना,हाडजोर्नी सम्बन्धी २६०,दाँत सम्बन्धी १७०,ईन्टर्रनल मेडिसिन सम्बन्धी १६० जना विरामीको स्वास्थ्य जाँच गरीएको थियो । त्यसमध्ये १४० जनाको दाँत निकालेको,१५० जनाको भिआइए जाँच गरीएको,१६० जनाको भिडियो एक्सरे गरीएको थियो ।

शिविर समापन कार्यक्रममा खनियाबास गाउँपालिकाका अध्यक्ष रणबहादुर तामाङले शिविरमा सेवा प्रदान गर्ने चिकित्सक तथा स्वास्थ्यकर्मीहरूलाई सम्मान गर्नुभएको थियो। साथै उहाँले निशुल्क स्वास्थ्य शिविर आयोजना र सहयोग गर्ने सम्पुर्णलाई धन्यवाद व्यक्त गर्नुभयो । शिविरमा गाउँपालिका उपाध्यक्ष सेक्केमान तामाङ, वडा अध्यक्ष,स्वास्थ्य प्रमुख आईतराम तामाङ,खनियावास ग्रामिण अस्पतालका ईन्जार्च शंकर पटेल लगायतको सहभागिता रहेको थियो ।कार्यक्रम सफल बनाउन अन्तर्राष्ट्रिय धादिङ समाजका अध्यक्ष तथा कार्यक्रम संयोजक राजन खकुराल, धादिङ समाज अमेरिका अध्यक्ष टकबहादुर रुवाली तथा धादिङ समाज बेल्जियमका अध्यक्ष कृष्णप्रसाद न्यौपानेलगायतको विशेष सहयोग रहेको थियो।