राष्ट्रिय परिचयपत्रका लागि स्थानीय तहमै विवरण संकलन अभियान

धादिङ, १३ असार ।
जिल्ला प्रशासन कार्यालय धादिङले राष्ट्रिय परिचयपत्र निर्माणका लागि स्थानीय तहमै विवरण संकलन कार्य तीव्र पारेको छ । कार्यलयले जेष्ठ नागरिक, अशक्त र अपाङ्गता भएका व्यक्तिहरूलाई लक्षित गरी स्थानीय तहमै विवरण संकलन कार्य तीव्र पारिएको हो ।

राष्ट्रिय परिचयपत्र तथा पञ्जीकरण विभागको सहयोगमा हाल थाक्रे गाउँपालिकामा विवरण दर्ता अपरेटरको तीन सदस्यीय टोली परिचालन गरिएको जानकारी दिएको छ।

प्रमुख जिल्ला अधिकारी सुमन घिमिरेका अनुसार नागरिकको मौलिक अधिकार सुनिश्चित गर्न र सेवा प्रभावकारिता बढाउन यो अभियान थालिएको हो। “जेष्ठ नागरिक, अशक्त र अपाङ्गता भएका व्यक्तिहरूका लागि कार्यालयसम्म आउन कठिन हुने भएकाले टोलीलाई स्थानीय तहमै खटाइएको हो,” घिमिरेले भन्नसभयो, “यो अभियानबाट नागरिकलाई घरनजिकै सेवा प्राप्त गर्ने अवसर मिलेको छ । उहाँले आगामी दिनमा जिल्लाका सबै पालिकामा टोली परिचालन गरिने बताउनुभयो ।

दर्ता कार्यमा सहजता ल्याउने उद्देश्यसहित गरिएको यो पहलप्रति स्थानीयवासीहरूले सकारात्मक प्रतिक्रिया जनाएका छन्।

यसअघि सोही टोली त्रिपुरा सुन्दरी गाउँपालिकामा समेत खटाइएको थियो। आगामी दिनमा अन्य पालिकाहरूमा पनि यो कार्य निरन्तररूपमा सञ्चालन गरिनेछ।