प्रदेशमै पहिलोपटक धादिङ जिल्ला पूर्ण खोप सुनिश्चित प्रमाणित

धादिङबेशी ५,असार । धादिङ जिल्ला बागमती प्रदेशमै पहिलोपटक पूर्ण खोप सुनिश्चितता तथा दिगोपनाको प्रमाणिकरण पाउने जिल्लाको रूपमा प्रमाणित भएको छ ।
बुधवार धादिङबेसीमा आयोजित जिल्ला स्तरीय पूर्ण खोप सुनिश्चितता तथा दिगोपना प्रमाणीकरण सभामा बागमती प्रदेश स्वास्थ्य मन्त्रालयले धादिङलाई आधिकारिक रूपमा प्रमाणपत्र प्रदान गर्दै यस ऐतिहासिक उपलब्धिको घोषणा गरेको हो। समारोहमा औपचारिक प्रतिबद्धता पत्रमा हस्ताक्षर गर्दै पूर्ण खोपको सुनिश्चिततासहित दिगोपनाको अभियानमा धादिङको अग्रणी भूमिका पुष्टि गरिएको थियो ।

सभालाई सम्बोधन गर्दै बागमती प्रदेशका स्वास्थ्य तथा जनसंख्या मन्त्री किरण थापाले खोप अभियानमा धादिङले देखाएको नेतृत्व, सक्रियता र सफलतालाई अन्य जिल्लाहरूका लागि प्रेरणाको स्रोत भएको बताउनुभयो । उहाँले स्थानीय, प्रदेश र संघीय सरकारबीचको समन्वयबिना दिगो स्वास्थ्य सुधार सम्भव नरहेको स्पष्ट पार्नुभयो । साथै, प्रदेश सरकारले स्वास्थ्य क्षेत्रमा आवश्यकता र समानताको आधारमा बजेट विनियोजन गर्दै आएको पनि बताउनुभयो ।

“स्थानीय स्रोतको उपयोग, स्वामित्व र सहभागिता — पूर्ण खोप सुनिश्चितता हाम्रो प्रतिबद्धता” भन्ने नारासहित आयोजित कार्यक्रममा मन्त्री थापासहित विभिन्न सरोकारवालाहरूले सामूहिक प्रतिबद्धता व्यक्त गरेका थिए ।

खोप सेवा विस्तारमा देखिएको स्थानीय नेतृत्व, नीतिगत निर्णय र समर्पणको उच्च मूल्याङ्कन गर्दै पालिका प्रमुखहरू, स्वास्थ्य शाखा प्रमुखहरू तथा अन्य सरोकारवालाहरूलाई मायाको चिनोसहित सम्मान गरिएको थियो । कार्यक्रममा महिला स्वास्थ्य स्वयंसेविकालाई थप प्रोत्साहन दिन राज्यले विशेष कार्यक्रम ल्याउनुपर्ने माग पनि उठाइएको थियो ।

जिल्ला खोप समन्वय समितिका अध्यक्ष तथा जिल्ला समन्वय समितिका प्रमुख नवराज अधिकारीको अध्यक्षतामा सम्पन्न समारोहले स्वास्थ्य सेवामा स्थानीय स्वामित्व, समावेशी सहभागिता र दिगो सहकार्यको अभ्यास सफलतापूर्वक स्थापित भएको पुष्टि गरेको छ ।

धादिङको सफलतालाई आधार मानेर अब प्रदेशका अन्य जिल्लाहरूमा पनि पूर्ण खोप सुनिश्चितताको अभियान सुदृढ पारिने अपेक्षा गरिएको छ ।