नीलकण्ठ–३ द्धारा अपाङ्गता भएकालाई खाद्य तथा दैनिक जीवनमा आवश्यक सामाग्री वितरण

धादिङ,२१ असार ।
धादिङको नीलकण्ठ नगरपालिका वडा नम्बर–३ ले अपाङ्गता भएका नागरिकहरुलाई खाद्य तथा दैनिक जीवनमा आवश्यक सामाग्री वितरण गरेको छ । वडाले घर घरमा पुगेर अपाङ्गता सम्बन्धि ख, ग, र घ परिचयपत्र प्राप्त नागरिकहरुलाई सामाग्री वितरण गरेको हो ।

अपाङ्गता भएका नागरिकहरुका लागि घरदैलो कार्यक्रम गरि सम्मान स्वरुप खाद्य तथा दैनिक जीवनमा आवश्यक सामाग्री वितरण गरिएको नीलकण्ठ नगरपालिकाका–३ का वडा अध्यक्ष राजकुमार श्रेष्ठले बताउनुभयो ।

‘अपाङ्गता भएका नागरिकहरुको दैनिकी सहज होस् भनेर घरदैलोमै पुगेर दैनिक जीवनमा आवश्यक कुखुराको अण्डा, झुल, चिनी, चियापति, मन्जन, ब्रस, सावुन, विस्कुट लगायत सामाग्री वितरण गरिएको उहाँले बताउनुभयो । वडा अध्यक्ष श्रेष्ठका अनुसार वडामा अपाङ्गता भएका ३३ जना मध्ये हालसम्म २३ जनालाई वितरण गरिएको छ ।

छुटेर वडामा आएकाहरुलाई पनि वितरण गरिएको वडा सदस्य सन्तोष थापाले बताउनुभयो । फजुल खर्च भन्दा पनि उहाँहरुको आवश्यकतालाई मध्यनजर गरि सेवालाई अझै प्रभावकारी बनाउन घर दैलो कार्यक्रम मार्फत वितरण गरिएको थापाले बताउनुभयो ।