पर्यटन प्रबर्द्धनलाई जोड दिन गंगाजमुनामा पर्यटन सत्कार, आधारभुत कुकिङ तथा सरसफाई तालिम

धादिङ,२४ बैशाख ।
गंगाजमुना गाउँपालिकामा पर्यटन सत्कार, आधारभुत कुकिङ तथा सरसफाई तालिम सम्पन्न भएको छ । गाउँपालिकाको समन्वय तथा युएनडीपीको सहयोगमा नेपाल ट्रेकिङ एजेन्सीज एशोसिएसन अफ नेपाल (TAAN) द्वारा सञ्चालित जीबिकोपार्जन पुनरुत्थानका लागि दीगो पर्यटन परियोजना(STLRP) अन्तरगत बैशाख २१ गतेदेखि अम्बोटेमा सुरु भएको तालिम आइतबार सम्पन्न भएको हो ।

पर्यटन प्रबर्द्धनलाई जोड दिने उद्धेश्यले तालिमको आयोजना गरिएको प्रमुख प्रशासकिय अधिकृत अनिल श्रेष्ठले बताउनुभयो । तालिममा सिकेको सीपलाई व्यबहारमा उतार्न सके आन्तरिक तथा बाह्य पर्यटन प्रबर्द्धनमा यसले महत्त्वपूर्ण योगदान गर्ने बिश्वास व्यक्त गर्नुभयो। अर्गानिक रैथाने उत्पादनबाट आधुनिक परिकार तयार गर्दा त्यसले पर्यटकलाई आकर्षित गर्न मद्दत गर्ने प्रमुख प्रशासकिय अधिकृत श्रेष्ठको भनाइ छ ।

तलिममा गुरुङ होमस्टका र गाउँपालिका भित्रका प्रत्येक वडा बाट ३ जना गरी ३५ जनाको सहभागिता रहेको थियो । सहभागिहरुले तालिममा फर्सिको केक, कोदोको पुलाउ, फलफुलको जुस लगायतका विभिन्न ३७ प्रकारका परिकार बनाउन सिकेका थिए । तालिममा टानमा आवद्ध पर्यटनबिद् तथा कुकहरु अजित आचार्य र सन्दीप अधिकारीले प्रशिक्षण गर्नुभएको थियो ।