कक्षा ८ को परिक्षामा विद्यार्थीलाई सास्ती,घण्टौँ लगाएर परिक्षामा सहभागी हुनुपर्ने बाध्यता

धादिङ,१४ चैत ।
धादिङको गल्छि गाउँपालिकाले कक्षा ८ को परिक्षामा परिक्षा केन्द्र परिवर्तन गरेपछि द्यिार्थीहरुले सास्ती खेप्नुपरेको छ । कक्षा ८ को परिक्षा दिनको लागि दुई घण्टा सम्मको यात्रा गर्नुपर्ने बाध्यता बनेको छ । गल्छी गाउँपालिकामा कक्षा ८ को परिक्षा केन्द्र आफ्नो विद्यालय बाहिर राखेपछि परिक्षार्थीहरुलाई समस्या परेको हो । गल्छी गाउँपालिका वडा नम्बर ८ को सिम्पानी,आदामारा,चैनपुर लगायतको क्षेत्रका परिक्षा दिनको लागि विद्यार्थीहरुलाई समस्या परेको हो ।

यसैगरी गल्छी गाउँपालिका वडा नम्बर ८ मा रहेको बालकुमारी आधारभुत विद्यालयका २२ जना विद्यार्थी परिक्षा दिनका लागि द राइजिङ भिलेज इगंलिस सेकेन्डरी स्कुल बैरेनी बजार सम्म जानुपर्ने बाध्यता रहेको छ ।परिक्षा दिन जान र घर फर्कनका लागि दिनभर लाग्नेभएपछि शारिरीक अप्ठेरो सँगै मनोबैज्ञानिक तनाव समेत बढेको विद्यार्थीहरुले बताएका छन् । यसैगरि गल्छी गाउँपालिका वडा नम्बर ३ को धादिङ आधारभुत विद्यालयका विद्यार्थी गल्छी गाउँपालिका वडा नम्बर २ मा रहेको कल्लेरी माविमा परिक्षा दिनुपर्ने बाध्यता छ ।

गल्छी गाउँपालिका बालमैत्री गाउँपालिका घोषणाको तयारी भएको भएपनि बालअधिकार विरोधी क्रियाकलाप पालिकाको शिक्षा शाखाबाट भएकोले बालअधिकार विरोधी क्रियाकलाप र विद्यार्थीलाई परिक्षाको नाममा सास्ती दिने काम बन्द गर्नु पर्ने बालअधिकारको क्षेत्रमा लामो समयदेखि क्रियाशिल अधिकारकर्मी गोकर्ण रुपाखेतीले बताउनुभयो ।