दोस्रो जलमुखी माई महोत्सव तथा होली विशेष कार्यक्रम हुदै

धादिङ,१० चैत ।
ऐतिहासिक, धार्मिक, सांस्कृतिक एवम् पर्यटकीय स्थल जलमूखी मन्दिरलाई राष्ट्रिय एवम् अन्तर्राष्ट्रिय स्तरमा प्रचार प्रसार गर्ने उदेश्यले दोस्रो जलमूखी माई महोत्सव तथा होली विशेष कार्यक्रम २०८० हुने भएको छ । चैत्र ११ गते हुने महोत्सवमा राष्ट्रिय ख्यातिप्राप्त कलाकारको प्रस्तुती समेत रहने आयोजकले जानकारी दिएको छ ।‘जलमूखी माई धार्मिक आस्थाको प्रचार, कृषि पर्यटन र विकासको मूल आधार’ भन्ने नारासहित हुन् गइरहेको महोत्सवमा दीपक खड्का, नवराज काप्री (भाले), सुमित्रा तामाङ, नारायण खत्री, सिताराम परियार लगायतका कलाकारको उपस्थिति रहेनछ ।

पुरातात्त्विक एवम् ऐतिहासिक दृष्टिकोणले जिल्लाकै महत्त्वपूर्ण सांस्कृतिक सम्पदाका रूपमा रहेको जलमूखी मन्दिरको परिचय र पहिचान विराट बनाउन अघिल्लो वर्ष सरह यस वर्ष पनि महोत्सवलाई निरन्तरता दिइएको वडा नम्बर ६ का वडाध्यक्ष किशोर सेढाईले बताउनुभयो ।
“सनातन परम्परामा चलिआएका मेला, पर्व तथा जात्राहरू देशभर नै लोपोन्मुख हुँदै गइरहेको अवस्थामा जिल्लामै सुप्रसिद्ध जलमुखी जात्रालाई व्यवस्थापन एवं निरन्तरता दिने उद्देश्यले पनि यो महोत्सव गरेका हौँ”, उहाँले भन्नुभयो, “मठमन्दिर हाम्रो देशको चिनारी हो । विश्वले नेपाल मठमन्दिरको देश भनेर चिनेको छ । तर, राजनीतिक परिवर्तन क्रमसँगै सम्पदा र संस्कृति मासिएका छन् । समाजले भुल्दै गएको संस्कृति र हराउँदै गएका सम्पदाको संरक्षणका लागि पनि प्रचलित जात्रा तथा मेलाहरू व्यवस्थापन एवं निरन्तरता आवश्यक छ ।” महोत्सवको तयारी पुरा भइसकेको सेढाईले बताउनुभयो ।

नीलकण्ठ नगरपालिका वडा नम्बर ९ का वडाध्यक्ष राजन बराइलीले जलमूखी मन्दिर ज्वालामूखी गाउँपालिका र नीलकण्ठ नगरपालिका दुवैको साँधमा पर्ने हुँदा दुवै स्थानीय सरकारले यस महोत्सव सफल पार्न भूमिका खेल्दै आइरहेको र यसमा निरन्तरता रहने बताउनुभयो । “आयोजक मूल संरक्षण समिति भए तापनि हामीहरूले प्रचारप्रसार लगायतका कुराहरूमा सहयोग तथा समन्वय गरेका छौँ । फागु पूर्णिमामा बर्सेनि लाग्ने यस मेलामा पोहोर साल जत्तिकै मानिसहरूको उपस्थिति हुने अनुमान गरेका छौँ । यसपालि पोहोर जसरी ३ दिनको गर्न सकेनौँ, तर आगामी वर्षदेखि थप व्यवस्थित बनाएर जानेछौँ । यसपालिदेखि नयाँ संरक्षण समिति पनि गठन भएको छ”, उहाँले भन्नुभयो ।

वडाध्यक्ष बराइलीले उच्च भूमिमा रहेको ऐतिहासिक जलमूखी मन्दिरको आन्तरिक तथा बाह्य पर्यटन प्रवर्द्धनका लागि पनि यस महोत्सव गरिएको बताउनुभयो । उहाँले पहिरोको जोखिममा रहेको मन्दिर क्षेत्रको व्यवस्थापन एवं जोखिम न्यूनीकरणको लागि दुवै सरकारबिच आपसी समन्वय भइरहेको समेत बताउनुभयो । जलमूखी मन्दिर संरक्षण समितिको आयोजनामा हुन् गइरहेको यस महोत्सवमा ज्वालामुखी गाउँपालिका वडा नम्बर ६ र नीलकण्ठ नगरपालिका वडा नम्बर ९ सहयोगी भूमिकामा रहेका छन् ।