अन्तर्राष्ट्रिय धादिङ समाजको शाखा अब कतारमा

अन्तर्राष्ट्रिय धादिङ समाजले कतारमा आफ्नो शाखा विस्तार गरेको छ । विभिन्न देशमा १८ औँ शाखा विस्तार गर्ने क्रममा कतारमा आफ्नो कर्मथलो बनाउँदै आएका समाजसेवी सोमनाथ कँडेल लाई धादिङ समाज कतारको जिम्मेवारी दिएको हो।‘जहाँ धादिङेली त्यहाँ धादिङ’ भन्ने मूल नारा लिएर संस्थाले धादिङ समाज राष्ट्रिय समन्वय परिषद विस्तार गर्दै आएको छ।स्थायी घर ज्वालामुखी गाउँपालिका रहेका कँडेल विगत लामो समयदेखि कतारमा बस्दै आउनुभएको छ । अन्तर्राष्ट्रिय धादिङ समाजका अध्यक्ष राजन खकुराल तथा महासचिव राजेन्द्र श्रेष्ठले संयोजक कँडेल लाई बधाई दिँदै विगत केही समयदेखि निष्क्रिय भएको धादिङ समाज कतारलाई सक्रिय बनाउनेमा विश्वस्त रहेको बताउनुभयो । संसारभरि छरिएर रहेका धादिङेहरुलाई एकै ठाउँमा ल्याएर साझा चौतारीको रुपमा स्थापित गर्ने उद्देश्यले अन्तर्राष्ट्रिय धादिङ समाज गठन र विस्तार गर्ने लक्ष्य लिइएको अध्यक्ष खकुरालले बताउनुभयो ।