धादिङमा भूमिहीन दलित, भूमिहीन सुकुम्बासीकालागि जग्गा नाँपचाज कार्य सिद्धलेकबाट सुरु

धादिङबेशी । धादिङमा भूमिहीन दलित, भूमिहीन सुकुम्बासी एंव अव्यवस्थित बसोसावासीहरुको लागि जग्गा नापजाँच कार्यक्रम सुरु भएको छ । सोमबार राष्ट्रिय भुमि आयोग धादिङको आयोजनामा सिद्धलेक गाउँपालिका वडा नं १ बैरेनीबाट जग्गा नापजाँच गर्ने कार्यक्रम सुरु भएको हो ।

सिद्धलेक गाउँपालिकाका अध्यक्ष परशुराम खतिवडाको अध्यक्षतामा भएको उद्धघाटन सत्रको कार्यक्रममा जिल्ला समन्वय समितिका प्रमुख नवराज अधिकारीको प्रमुख आतिथ्यता रहेको थियो । कार्यक्रममा नेपाल नगरपालिका संघका अध्यक्ष एंव नीलकण्ठ नगरपालिकाका मेयर भीम प्रसाद ढुंगाना विशेष आतिथ्यता रहेको थियो । त्यसैगरी समन्वय समितिका उप प्रमुख कुलमान बिश्वकर्मा, राजनितिक दलका प्रतिनिधिहरु,निर्वाचित जनप्रतिनिधिहरु,सरोकारवाला,नागरिक समाज,पत्रकार लगाएतको उपस्थिति रहेको थियो ।

उद्धघाटन कार्यक्रमलाई सम्बोधन गर्नुहुँदै जिल्ला समन्वय समितिका प्रमुख नवराज अधिकारीले भूमिहीन लाई जग्गा प्रदान गर्ने कार्यमा सिद्धलेक गाउँपालिका अगाडि रहेको भन्दै पुर्जा वितरण पनि सिद्धलेक १ बाट नै सुरुवात हुने अपेक्षा लिएको बताउनु भयो । उहाँले जिल्ला समन्वय समितिको तर्फबाट गर्नुपर्ने समन्वय र सहकार्यको लागि आफुहरु तयार रहेको समेत प्रतिवद्धता ब्यक्त गर्नु भयो ।

कार्यक्रमका विशेष अतिथि समेत रहनु भएका नीलकण्ठ नगरपालिकाका मेयर भीम प्रसाद ढुंगानाले सिद्धलेकबाट सुरु भएको भूमिहीन दलित, भूमिहीन सुकुम्बासी एंव अव्यवस्थित बसोवासीहरुको लागि जग्गा नापजाँच गर्ने कार्य सुरु भएको भन्दै खुशी व्यक्त गर्नुभयो । मेयर ढुंडानाले अब २०८० साल भित्रै लालपुर्जा वितरण कार्य गर्नको लागि आग्रह गर्नु भयो । उहाँले लालपुर्जा पाउनुहुने सुकुम्बासीहरुले आफुले पाएको जग्गालाई बाझो नराखी उत्पादन सुरु गर्नुपर्ने बताउनुभएको छ ।

त्यसैगरी सिद्धलेक गाउँपालिकाका अध्यक्ष परशुराम खतिवडाले सिद्धलेक सरकारले गाउँ पालिकाको विकासलाई केन्द्र विन्दुमा राखेर निरन्तर काम गरिरहेको बताउनु भएको छ । सिद्धलेक गाउँपालिकाले स्व–मुल्यांकन ८४ प्रतिशत, कार्य सम्पादनमा ४८.६० प्रतिशत ल्याएर अग्र स्थान हासिल गरेको भन्दै भुमिहिनलाई जग्गा प्रदान गर्ने कार्यमा पनि धादिङ कै पहिलो स्थानिय तह भएको बताउनु भएको छ ।

धादिङको सिद्धलेक गाउँपालिका बाट सुरु भएको जग्गा नापजांच कार्य सवै स्थानिय तहमा सकिएपछि लालपुर्जा बितरण कार्य सुरु गरिने राष्ट्रिय भुमि आयोग धादिङका अध्यक्ष कृष्ण प्रसाद अर्यालको भनाई छ ।