धादिङमा अन्तर्राष्ट्रिय सालक दिवस भव्य रुपमा मनाईयो

धादिङबेशी । धादिङमा अन्तर्राष्ट्रिय सालक दिवस भव्य रुपमा मनाईएको छ । डिभिजन वन कार्यालय धादिङको आयोजनामा आज नीलकण्ठ माध्यामिक विद्यालय प्राङ्गणमा धादिङमा पहिलो पटक अन्तर्राष्ट्रिय सालक दिवस मनाइएको हो ।

नागरिकहरुलाई सालकको बारेमा जनचेतना फैलाउने र संरक्षण गर्ने उद्देश्यले सालक दिवसको अवसरमा विषेश कार्यक्रम आयोजना गरिएको डिभिजन वन कार्यालय धादिङका प्रमुख विष्णु प्रसाद आचार्यले बताउनु भयो । सालकको संरक्षणमा सबै एकजुट भएर लाग्नको लागि उहाँले आग्रह गर्नुभएको छ ।

कार्यक्रममा सालकको बारेमा तयार गरिएको गित, कथा, कविता भजन प्रस्तुत गरिएको थियो । त्यसैगरी आज अन्तर्राष्ट्रिय सालक दिवसकै अवसरमा पारेर “हाम्रो सालक, प्यारो सालक“ पुस्तक लोकार्पण गरिएको छ । डिभिजन वन कार्यालय धादिङका प्रमुख विष्णु प्रसाद आचार्यको अध्यक्षतामा भएको कार्यक्रममा बागमती प्रदेश सांसद गोविन्द लम्सालको प्रमुख आतिथ्यता रहेको थियो ।

कार्यक्रममा जिल्ला समन्वय समितिका प्रमुख नवराज अधिकारी, उप प्रमुख कुलमान वि.क, नीलकण्ठ नगरपालिकाका मेयर भिम प्रसाद ढुगाना,‘समुदायिक वनका उपभोक्ता समिति, टोल सुधार समिति शिक्षक, विद्यार्थी लगायतको उपस्थिति रहेको थियो ।

कार्यक्रमलाई सम्बोधन गर्दै बागमती प्रदेश सांसद गोविन्द लम्सालले सालकलाई धेरै ठाउमा देखेको भएता पनि यसको महत्व भने नागरिकहरुलाई त्यति थाहा नभएको बताउनु भयो । कृषकहरूको लागि सालक अत्यन्त महत्वपूर्ण रहेको भन्दै मान्छेको संरक्षण गरे जसरी नै सालकको संरक्षण गर्नुपर्ने प्रदेश सांसद लम्सालको भनाई छ ।
त्यसैगरी नीलकण्ठ नगरपालिकाका प्रमुख भीम प्रसाद ढुङ्गानाले बन,बातावरण,चौतारो र सालक जस्ता संरक्षण गर्नुपर्ने बिषय बस्तुमा नीलकण्ठ नगरपालिका तत्पर रहेको भन्दै आगामी दिनमा सहकार्य गरेर अगाडी बड्ने प्रतिवद्धता ब्यक्त गर्नु भएको थियो ।

त्यसैगरी प्रमुख जिल्ला अधिकारी बद्रीनाथ गैह्रेले सालक संरक्षणमा ध्यान दिएर काम गरेकोमा डिभिजन वन कार्यालयलाई धन्यवाद दिदै जिल्लामा सालक सम्बन्धी विगतमा यस्तो कार्यक्रम नभएको बताउनुभयो । पछिल्लो समय सालकाको चोरी निकासी बढ्दै भएको हुनाले यसको संरक्षण गर्नुपर्ने उहाँले बताउनुभयो । सालकलाई स्थानिय स्तरको पाठ्यक्रममा समाबेश गर्नुपर्ने र सालक संरक्षणमा सबैको जिम्मेवारी उतिकै रहेको प्रमुख जिल्ला अधिकारी गैह्रेको भनाई छ ।