अन्तर्राष्ट्रिय सालक दिवसको अवसरमा धादिङमा रेडियो अन्तरसंवाद कार्यक्रम

धादिङबेशी । अन्तराष्ट्रिय सालक दिवसको अवसरमा धादिङमा रेडियो अन्तर संवाद कार्यक्रम सम्पन्न भएको छ । डिभिजन वन कार्यालय धादिङको आयोजना र साना स्तनधारी प्राणी संरक्षण तथा अनुसन्धान केन्द्र, नेपाल पत्रकार महासंघ धादिङ, रेडियो धादिङ,नीलकण्ठ एफ.एम,र रेडियो बिहानीकोे सहकार्यमा कार्यक्रम सम्पन्न भएको हो ।

सालक संरक्षणको लागि एकता भन्ने नाराका साथ भएको रेडियो अन्तर संवादमा कार्यक्रममा सालक कस्तो प्रकारको जनावर हो,यसको महत्व किन छ , सालक लोभ हुनुको कारण केहो,सालकको तस्करी किन हुन्छ होला र यसको संरक्षणमा कसको जिम्मेवारी के होला भन्ने बिषयमा छलफल गरिएको थियो । संवादमा जिल्ला समन्वय समिति धादिङका प्रमुख नवराज अधिकारी, सालकको क्षेत्रमा बिद्याबारिधि गर्नु भएको तुलसी लक्ष्मी सुवाल, डिभिजन वन कार्यालय धादिङका प्रमुख विष्णु प्रसाद आचार्य अन्तरसवाद कार्यक्रममा सहभागी हुनुभएको थियो ।

रेडियो अन्तर संवाद कार्यक्रममा तुलसी लक्ष्मी सुवालले सालकको प्रजाति, वासस्थान,सालकको महत्व लगायतका विषयमा प्रष्ट पार्नुभएको थियो । सालक संरक्षणमा जिल्ला तहबाटै द्रूत गतिमा लागि परेर काम गर्ने जिल्ला समन्वय समितिका प्रमुख नवराज अधिकारी बताउनु भएको छ । डिभिजन वन कार्यालय धादिङ र स्थानिय तहसँग समन्वय गरेर सालक संरक्षण सम्बन्धि निति कार्यक्रम लगायतका जनचेतना मुलक कार्यक्रमहरु संचालन गरेर धादिङलाई अगाडि बढाउने योजना रहेको अधिकारीको भनाई छ ।

बन कार्यालयले जिल्लाको १३ वटै स्थानिय सरकारसँग समन्वय गरेर हरेक पालिकामा सालकको मुर्ति बनाउने अभियान सन्चालन गर्ने डिभिजन वन कार्यालय धादिङ प्रमुख विष्णु प्रसाद आर्चायले बताउनुभयो । धादिङमा सालकको प्रचार, संरक्षण तथा प्रवद्र्धन गर्नलाई अभियानको रुपमा काम गर्छ भन्ने आशयले सालकको मुर्ति स्थापना गरेर प्रचार प्रसारलाई जोड दिएको आचार्यको भनाइ छ । । धादिङमा भएको संरक्षित वन्यजन्तु सालकलाई जोगाउनु र जनतालाई चेतना वृद्धि गर्ने वन कार्यालयको पहिलो दायित्व भएकाले प्रचार प्रसारको कामलाई प्राथमिकता दिएको उहाँले बताउनु भयो ।

संसारमै दुर्लभ मानिएका ८ प्रजातिका सालकमध्ये नेपालमा कालो सालक (चाइनिज प्यांगोलिन) र तामे सालक (इन्डियन प्यांगोलिन) पाइन्छ । नेपालमा पाइने स्तनधारीमध्ये कालो सालक आईयूसीएनको अति संकटापन्न सूचीमा रहेको छ । सालक दिवसको अवसरमा भोली धादिङबेशी स्थित नीलकण्ठ माविमा डिभिजन बन कार्यालय धादिङ द्धारा सालक संरक्षणमा जनचेतना फैलाउने उदेश्यले बिबिध कार्यक्रमको आयोजना गरिएको छ ।