‘जनतासँग माओवादी विशेष रुपान्तरण अभियान’ सकियो, पार्टी जनतासँग जोडिएको र जनताको असली सहयोगी माओवादी नै हो भन्ने बुझाइ बढेको निष्कर्ष

धादिङबेशी । पार्टीलाई रुपान्तरण गर्ने उद्देश्यले नेकपा माओवादी केन्द्रले सञ्चालन गरेको ‘जनतासँग माओवादी विशेष रुपान्तरण अभियान’ सोमबार देखि सकिएको छ । माओवादी केन्द्रले धादिङले गत भदौ १६ गतेदेखि सुरु गरेको अभियानको सोमबार पार्टी कार्यालय धादिङमा एक कार्यक्रमको आयोजना गरि अभियानका कमन्डरहरुलाई समिक्षा सहित बिदाई गरि कार्यक्रमको समापन गरेको होे ।

नेकपा माओवादी केन्द्र धादिङका संयोजक मनराज भण्डारीको अध्यक्षतामा भएको कार्यक्रममा माओवादी केन्द्र धादिङका ईन्चार्ज शालिकराम जम्कटेलको प्रमुख आतिथ्यता रहेको थियो ।

कार्यक्रममा प्रमुख अतिथि जम्कटेलले धादिङ जिल्लाको पालिकाहरुमा आउनु भएका बाहिर जिल्लाका कमाण्डरहरुलाई खादा र प्रमाणपत्रले सम्मान गर्नु भएको थियो । प्रमुख अतिथि जम्कटेलले अभियानका कमान्डरहरुले दिएको सुझावलाई मनन गरि आगामी दिनमा पार्टीका हितका निमित्त सोहि अनुसार कार्यसम्पादन गरिने बताउनु भयो । जनताको उल्लेख्य सहभागिता रहेपछि माओवादी केन्द्रले अभियान एक महिना थप गरेको थियो ।

अभियानबाट पार्टी जनतासँग जोडिएको तथा जनताको असली सहयोगी माओवादी केन्द्र नै हो भन्ने बुझाइ बढेको माओवादी केन्द्रको निष्कर्ष छ । अभियानले टोलटोलमा कमिटी बनेको, निष्क्रिय कमिटी सक्रिय भएका देखिन्छन् ।