वैदेशिक रोजगार छात्रवृत्तिका लागि आवेदन खुल्यो, धादिङको लागि कहाँ सम्पर्क राख्ने ?

धादिङ,५ मंसिर
वैदेशिक रोजगारीका क्रममा ज्यान गुमाएका, पूर्ण रूपमा असक्त वा गम्भीर बिरामी भएका कामदारका बालबालिकालाई वैदेशिक रोजगार छात्रवृत्तिका लागि आवेदन खुलेको छ । श्रम स्वीकृति लिएर वैदेशिक रोजगारीमा गएका र करार अवधिभित्रै विदेशमा ज्यान गुमाएका वा पूर्ण रूपमा अशक्त वा गम्भीर बिरामी भएर फर्किएका श्रमिकका बालबालिकालाई शैक्षिकसत्र २०८० को छात्रवृत्तिका लागि निवेदन दिन वैदेशिक रोजगार बोर्डको सचिवालयले सूचना जारी गरेको छ ।

निवेदन आगामी असोज मसान्तसम्म दिन सकिनेछ । सामुदायिक तथा संस्थागत विद्यालयमा अध्ययनरत विद्यालयस्तर पूर्वप्राथमिक कक्षा वा नर्सरी वा सो सरहदेखि कक्षा १२ सम्मका १८ वर्ष मुनिका बालबालिकाहरूले मात्र निवेदन दिन सक्नेछन् । यस्तै, निवेदन दिनको लागि गएको असार मसान्तभित्र बोर्डबाट पाउनुपर्ने आर्थिक सहायता लिएको हुनुपर्छ । आधारभुत तहका लागि १२ हजार र माध्यमिक तहको लागि नगद १६ हजार रुपैँया प्राप्त गर्नेछन् ।वैदेशिक रोजगारीका क्रममा अशक्त भएका श्रमिकको पूर्ण रूपमा अशक्त भएको खुल्ने कागजात, विद्यार्थी जन्मदर्ताको प्रतिलिपि, निवेदक, संरक्षक र श्रमिकबीचको नाता प्रमाणको प्रतिलिपि, सम्बिन्धित स्थानीय तहको सिफारिस आवश्यक पर्छ ।

यस्तै छात्रवृत्ति प्राप्त गरिरहेका बालबालिकाले भने निवेदन, अध्ययनरत विद्यालयको कक्षा खुल्ने सिफारिस पत्र र श्रमिकको राहदानीको प्रतिलिपि पेस गर्नुपर्नेछ । एक विद्यार्थीलाई वर्षमा एक पटक बोर्डले एकमुष्ट रूपमा छात्रवृत्ति दिन्छ । छात्रवृत्तिका सम्बन्धमा थप बुझ्न परेमा श्रम कल सेन्टरमा टोल फ्री नम्बर ११४१ र बोर्डमा ०१ ५३२०३११,४३३ मा फोन गर्न सकिने विभागले जनाएको छ । साथै धादिङको लागि नीलकण्ठ नगरपालिकाद्वारा सन्चालित सुरक्षित आप्रवासी सामी कार्यक्रम अन्तरगत आप्रवासी श्रोत केन्द्र जिल्ला प्रशासन कार्यालयको १६ नम्बरमा सम्पर्क गर्न सक्नुहुनेछ भने ०१०५२१३१४ मा फोन गरेर बुझ्न सक्नुहुनेछ ।