रिङरोड अन्तरगत गोलाभञ्यांङ –चामभञ्याङ– स्याउली रोडको स्तर उन्नती गरिने

धादिङ,२१ कार्तिक
नीलकण्ठ नगरपालिकाको गौरवको योजना अन्तरगत रहेको रिङरोडको योजनाको काम सुरु हुने भएको छ । रिङरोडको सडक मध्ये गोलाभञ्यांङ –चामभञ्याङ– स्याउली सडकको स्तरउन्नति गरिने भएको छ ।रिङरोडलाई नीलकण्ठ नगरपालिकाले बहुबर्षिय योजनामा पार्न सफल भएपनि पछि राजनीतिक चलखेलको कारण योजना काटिएको नगर प्रमुख भीम प्रसाद ढुंगानाले बताउदै आउनु भएको छ ।विभिन्न सार्वजनिक कार्यक्रममा समेत मेयर ढुंगानाले काँग्रेसको मेयर भएकै कारण यसअघिको कार्यकालमा पनि रिङरोडलाई बहुबर्षि योजनाबाट हटाएको दुखेसो पोख्नुभएको थियो ।

यस आर्थिक बर्षमा नगरपालिकाले सडक स्तरउन्नतीको लागि बजेट बिनियोजन समेत गरेको छ ।सोहि अनुसार रिङ रोड निर्माणका लागि निर्माण कम्पनी समेत छनोट गरेको छ ।बोलपत्रमा सबैभन्दा कम मूल्य दाबी गर्ने विश्वश्री कन्सट्रक्सनलाई निर्माणको जिम्मा दिएको हो । कन्स्ट्रक्सनले ७६ लाख ९२ हजार १ सय ८७ रुपियाँमा निर्माण जिम्मा लिएको हो ।

यो कम्पनीले गोलाभञ्यांङ चामभञ्याङ स्याउली रोडको स्तरउन्नति गर्ने जिम्मा पाएको हो । नगरपालिकाले सार्वजनिक खरिद ऐन २०६३ को दफा २७ तथा सोहि ऐनको दफा ४७ को प्रयोजनार्थ विश्वश्री कन्स्ट्रक्सनलाई जिम्मा दिएको हो । नगरपालिकाले ससाह, मुरली भञ्यांङ, पाल्पा भञ्यांङ, ज्यामरुङ, गोला भञ्यांङ भर्याङ भुरुङ, खाल्टे, भोर्ले, सुनौलाबजार तारुखर्क मश्राईछाप हुदैं ससाहमा सडकलाई जोड्नेछ। रिङरोड निर्माणले अन्तर वडामा आर्थिक क्रियाकलापमा सहयोग पुग्ने अपेक्षा गरिएको छ ।