राष्ट्रपति उत्कृष्ट कृषक पुरस्कारबाट धादिङका तीन जना पुरस्कृत

धादिङ, ३० असोज ।
धादिङका तीन जना कृषक पुरस्कृत भएका छन् । जिल्ला स्तरीय रास्ट्रपति उत्कृष्ट कृषक पुरस्कारबाट धादिङको धुनिबेसी नगरपालिका–९ का मौरी पालक कृषक रामराजा पाण्डे, फुल खेती गर्ने कृषक पेमा डोल्मा, नीलकण्ठ नगरपालिका वडा नम्बर ३ का भैंसी पालक कृषक विनोद कुमार श्रेष्ठ पुरस्कृत भएका हुन् ।

कृषि ज्ञान केन्द्र धादिङले उत्कृष्ट छनोट भएका तीन जना कृषकलाई ४३ औं खाद्य दिवसको अवसरमा जनही १२ हजार पाँच सय नगद र प्रमाण पत्र सहित पुरस्कृत गरेको हो ।

कार्यक्रमलाई सम्बोधन गर्नुहुँदै जिल्ला समन्वय समिति धादिङका प्रमुख नवराज अधिकारीले कृषि क्षेत्रमा धेरै समस्या भएको हुनाले स्थानिय तहले विशेष ध्यान दिनुपर्ने बताउनु भयो । त्यस्तै कृषिमा नयाँ नयाँ कार्यक्रमहरु सञ्चालन गरेर कृषि पेसामा आम नागरिकहरुलाई प्रोत्साहन गर्नु आजको आवश्यकता रहेको अधिकारीले बताउनु भयो ।

त्यसैगरी प्रमुख जिल्ला अधिकरी बद्रीनाथ गैह्रेले कृषि पेसालाई सरकारले विशेष ध्यान दिएर बजेट छुटाउनु पर्ने बताउनुभयो । अबको किसानहरुले कृषि पेसालाई व्यवसाई मुखी बनाएर लैजानु पर्ने उहाँले बताउनु भयो । कृषि पेसामा आत्मर्निभर हुनको लागि आधुनिक उपकरणहरुको प्रयोगमा जोड दिनुपर्ने प्रमुख जिल्ला अधिकरी गैह्रेको भनाइ छ ।

कृषि ज्ञान केन्द्र धादिङका प्रमुख निर्मला गुरुङको सभापतित्वमा सम्पन्न्न कार्यक्रममा जिल्ला समन्वय समिति धादिङका प्रमुख नवराज अधिकारीको प्रमुख आतिथ्य तथा प्रमुख जिल्ला अधिकरी बद्रीनाथ गैह्रेको विषेश आतिथ्य रहेको थियो ।