बेनिघाट रोराङ गाउँपालिकाको नमुना काम : बृद्धलाई दौरा सुरुवाल र बृद्धालाई गुन्यु चोलो

धादिङ,२१ असोज
धादिङको बेनीघाट रोराङ गाउँपालिकाले जेष्ठ नागरीक सम्मान तथा घर दैलौ स्वास्थ्य परिक्षण कार्यक्रम संचालन गरेको छ । गाउँपालिकाले ८४ वर्ष भन्दा माथि उमेरका ज्येष्ठ नागरिकहरुलाई घर–घरमा पुगेर सेवा दिने गरी कार्यक्रम सुरु गरेको हो । गाउँपालिका अन्तर्गतको महिला तथा बालबालिका शाखाले गाउँपालिका भित्रका १० वटै वडामा गएर जेष्ठ नागरीहरुलाई सम्मान गरिएको शाखा प्रमुख पुजा खनालले बताउनुभयो । नजिकिदै गरेको दशैलाई मध्यनजर गर्दै ८४ वर्ष भन्दा माथिका बृद्धहरुलाई दौरा सुरुवाल र बृद्धाहरुलाई गुन्यु चोलो दिएर सम्मान गरिएको खनालले बताउनुभयो ।

त्यसैगरी हिड्न नसक्ने, स्वास्थ्य संस्था सम्म पुग्न नसक्ने जेष्ठ नागरीक तथा असक्तहरुको लागि घरमै गएर स्वास्थ्य परिक्षण गरिएको स्वास्थ्य शाखा प्रमुख ब्रजेश तामाङले बताउनुभयो । स्वास्थ्य परिक्षणका क्रममा प्रेसर, सुगर परिक्षण तथा नसर्ने रोगहरुको पहिचान गरी आवश्यक औषधि तथा परामर्श सेवा प्रदान गरिएको तामाङले बताउनुभयो । घरमै पुगेर स्वास्थयकर्मीले स्वास्थ्य परिक्षण गर्न थालेपछि जेष्ठ नागरिक खुसी छन् ।

३३ औँ अन्तर्राष्ट्रिय ज्येष्ठ नागरिक दिवसको अवसरमा सुरुवात गरिएको जेष्ठ नागरीक सम्मान तथा स्वास्थ्य परिक्षण कार्यक्रमलाई आगामी दिनमा पनि निरन्तरता दिने बेनीघाट रोराङ गाउँपालिकाका अध्यक्ष कृष्ण बहादुर थपलियाले (बिबेक)ले बताउनुभयो । गाउँमा गएर जेष्ठ नागरिकहरुलाई सम्मानको साथै स्वास्थ्य परिक्षण गर्दा जेष्ठ नागरिकहरु खुसि हुनु भएको गाउँपालिकाका उपाध्यक्ष टाप बहादुर श्रेष्ठले जानकारी दिनुभयो । स्थानिय सरकारको प्रत्याभुती गर्ने गरी आफुहरुले काम गरीरहेको भन्दै श्रेष्ठले पालिका भित्रका जेष्ठ नागरिकहरुको समस्यामा पालिकाले काम गर्ने समेत बताउनु भएको छ ।