विवादपछि रोकिएको धादिङ–२ को मतगणना पाँच घण्टापछि सुचारु

धादिङ/ मतपेटिकामा उल्लेख गरिएको मतपत्र र गणनाको क्रममा भेटिएको मतपत्रको संख्या नमिलेपछि स्थगित भएको धादिङ क्षेत्र नम्बर २, प्रदेशसभा २ को मतगणना पुनः सुरु भएको छ ।

गंगाजमुना गाउँपालिका–४ को तामाङखर्क मावि (ख) केन्द्रको एउटा मतपेटिकामा चार सय ३७ मतपत्र उल्लेख भएको र मानवीय त्रुटिका कारण गणकले दलका प्रतिनिधिलाई सुनाउने क्रममा कम भनिएको कारण उत्पन्न भएको विवाद उम्मेदवारका प्रतिनिधिहरुलाई मुचुल्कासहित स्पष्ट पारेपछि गणना सुचारु भएको मुख्य निर्वाचन अधिकृत स्वीकृति पराजुलीले बताउनुभयो । मुख्य निर्वाचन अधिकृत पराजुली भने, ‘यो मानवीय त्रुटी हो, मतपत्रमा तलमाथि भएको छैन । गणकले उम्मेदवारका प्रतिनिधिलाई सुनाउने क्रममा संख्यामा तलमाथि भएको हो, मतपत्र चार सय ३७ नै रहेको छ ।’ खनियाबास गाउँपालिका वडा नम्बर ४ को गणेशकुण्ड मावि (ख) केन्द्रको मतपेटिकाको २ वटा शिल नभएको भेटिएको दलका प्रतिनिधिहरुले बताएका छन् । मत पेटिकाको दुई वटा शिल नभएको विषयमा पराजुलले मतपेटिका राखिएको स्थल र गणना स्थल दुबैमा सिसी क्यामरा जडान गरिएको जानकारी गराउँदै मतपेटिका राखिएको स्थल र गणनास्थल सुरक्षित रहेको बताए । उम्मेदवारका प्रतिनिधि र निर्वाचन अधिकृृतहरुबीचको छलफल पछि विवाद मिलेको छ । हाल मतगणना सुचारु रहेको मुख्य निर्वाचन अधिकृत पराजुलीले जानकारी दिनुभयो ।

मत गणनाका क्रममा गणकहरुले उपलब्ध गराएको मत संख्याभन्दा एक सय मत बढी गणना भएपछि राप्रपा र नेकपा एमालेका प्रतिनिधिहरुले विवाद गरेर गणना कार्य रोकेका थिए । गणना रोकिएपछि एमाले राप्रपाका कार्यकर्ताहरुले मतगणना स्थलबाहिर नाराबाजी गरेका थिए । राप्रपाका प्रतिनिधि र कार्यकर्ताले भने धादिङ क्षेत्र नम्बर २, प्रदेशसभा २ मा पर्ने त्रिपुरासुन्दरी गाउँपालिका वडा नम्बर ५ को केन्द्र (ख), गंगाजमुना गाउँपालिका–४ को तामाङखर्क मावि (ख) केन्द्र र रुविभ्याली गाउँपालिका–५ को पुरु र नेवेरको गरी चार वटा मतपेटिका मिसाउँदा मुचुल्कामा उल्लेख भएअनुसार एक हजार नौ वटा मतपत्र हुनुपर्नेमा एक हजार दुई सय एक वटा मतपत्र भेटिएको बताएको छ । यो क्षेत्रमा एमाले राप्रपाबीच तालमेल छ । सत्ता गठबन्धनका तर्फबाट नेकपा माओवादीका जगत सिंखडा र एमाले राप्रपाबीच तालमेलको साझा उम्मेदवार राप्रपाका डम्बर तामाङबीच प्रतिष्पर्धा छ । एमाले राप्रपाका कार्यकर्ताले भने माओवादीका कार्यकर्ताले सेटिङमा मतपेटिकाको शिल तोडेर मतपत्र खसालेको आरोप लगाएको छ ।