नलाङमा शैक्षिक तालिम सम्पन्न,समय सापेक्ष शिक्षामा परिवर्तन आवश्यक भएको मन्त्री जम्कट्टेलको भनाई(अडियो सहित)

धादिङ,१० भाद्र।
धादिङको सिद्धलेक गाउँपालिका वडा नं २ स्थित नलाङ मोडेल एकेडेमीमा ४ दिने शैक्षिक तालिम सकिएको छ । शिक्षण सिकाई क्रियाकलापलाई थप प्रोत्साहन गर्न, ग्रामिण स्तरमा शिक्षालाई थप प्रभावकारी बनाउन र शैक्षिक प्रविधि तथा सिकाई विधिमा रुपान्तरण गर्ने उद्धेश्यले मंगलबारदेखी सुरु भएको शैक्षिक तालिमको आज एक कार्यक्रमका बिच सम्पन्न भएको हो ।

नेपालका लागि इजरायली राजदुत खनान गोदारको अध्यक्ष्यतामा भएको समापन कार्यक्रममा बागमती प्रदेशका आर्थिक मामिला तथा योजना मन्त्री शालिकराम जम्कट्टेलको प्रमुख आतिथ्यता रहेको थियो । कार्यक्रममा सिद्धलेक गाउँपालिकाका अध्यक्ष परशुराम खतिवडा, प्रमुख जिल्ला अधिकारी कृष्ण प्रसाद लम्साल, मसाभ एजुकेसनल तालिम केन्द्रका प्रमुख एवं तालिमका प्रशिक्षक युदिथ रोसेन्थल, शिक्षा विकास तथा समन्वय ईकाईका कृष्ण कुमार श्रेष्ठ लगायतको आतिथ्यता रहेको थियो ।

कार्यक्रमलाई सम्बोधन गर्दै मन्त्री जम्कट्टेलले विकासको निम्ति अगाडि बढेको भन्दै शिक्षा क्षेत्रलाई समय सापेक्ष विज्ञान र प्रविधिले गरेको विकासमा आधारित बनाएर लानु पर्ने बताउनुभयो । उहाँले हिजोको परम्परावादी शिक्षा, पढाइले स्वाभाविक ढङ्गले अबको विकासलाई समात्न नसक्ने भन्दै यस्ता तालिमहरुले ठुलो सहयोग गर्ने र नलाङ मोडेल एकेडेमीमा यो व्यवस्था भएको बताउनुभयो ।

यस्ता कार्यक्रमहरु नियमित रुपमा गर्न आग्रह गर्दै उहाँले आगामी दिनमा निरन्तर सहयोग गर्ने प्रतिबद्धता व्यक्त गर्नुभएको छ । फरक प्रसंगमा उहाँले आफु निर्वाचित भएर गइसकेपछि सिद्धलेकको विकासको निम्ति धेरै प्रयत्न गरेको भन्दै ५ वर्षमा गाउँपालिकाको बाटो, खानेपानी, पूर्वाधार शिक्षाको क्षेत्रमा धेरै बजेटहरु आएको बताउनुभयो ।

आर्थिक मामिला तथा योजना मन्त्री शालिकराम जम्कट्टेल आवाज

यस्तै प्रजिअ लम्सालले राजदुत गोदेरसँग ईजरायलमा भएका बिभिन्न विधि प्रविधीहरु नेपालमा भित्र्याउन आवश्यक रहेको बताउनुभयो । उहाँले आगामी कृषि प्रविधि र शैक्षिक कार्यका लागि राजदुत खनान गोदेरलाई पुनःधादिङमा आमन्त्रण गर्नुभएको छ ।

प्रमुख जिल्ला अधिकारी कृष्ण प्रसाद लम्सालको आवाज

कार्यक्रममा इजरायली राजदुत खनान गोदारले धादिङमा बिभिन्न कार्यहरुका लागि हातेमालो गर्ने बताउनुभएको छ ।

नेपालका लागि इजरायली राजदुताबास,लाजिम्पाट काठमाण्डौको सहयोग तथा मसाभ शैक्षिक तालिम केन्द्रकी निर्देशक युदिथ रोसेन्थालको नेतृत्वमा शैक्षिक रुपान्तरण कार्यक्रम अन्तरगत संचालन गरिएको शैक्षिक तालिममा सिद्धलेकका बिभिन्न बिद्यालयको २७ जना शिक्षक–शिक्षिकाको सहभागिता रहेको थियो ।

तालिममा सहभागि शिक्षक–शिक्षिकाहरुलाई मन्त्री जम्कट्टेल, प्रजिअ लम्साल, राजदुत गोदेर र तालिमका प्रशिक्षक रोसेन्थलले प्रमाण पत्र वितरण गर्नुभएको नलाङबाट अर्जुन सिलवालले जानकारी दिनुभयो ।