नेपाल तेक्वान्दो संघ जिल्ला कार्यसमिति धादिङद्धारा पदक विजेता खेलाडीलाई नगद सहित सम्मान

धादिङ,०३ बैशाख ।
नेपाल तेक्वान्दो संघ धादिङले पदक जित्न सफल जिल्लाका ११ जना खेलाडीलाई नगदसहित सम्मान गरेको छ । शनिबार आज एक समारोहको बिच नीलकण्ठ नरपालिकाका मेयर भिम प्रसाद ढुङ्गानाले स्वर्ण पदक विजेता खेलाडीलाई नगद ४ हजार र रजत र कास्य पदक विजेता खेलाडीलाई नगद ३ हजार र प्रमाण पत्र सहितले सम्मान गर्नुभएको हो ।

सम्मानित हुने पदक विजेता खेलाडीहरुमा रुपेश तामाङ, सुप्रिमा बजगाई, अभिषेक डल्लाकोटी, आशिक गुरुङ, धनबहादुर गुरुङ, प्रमिता तामाङ, मनोज श्रेष्ठ, प्रमिला गुरुङ, पावल तामाङ, सुशान्त पाण्डे र प्रविन तामाङ रहेका छन् ।

उक्त कार्यक्रमलाई सम्बोधन गर्नुहुदैँ मेयर ढुङ्गानाले नीलकण्ठ नरपालिकाको हरेक वडामा खेलकुदका पूर्वाधारहरु सुरुभएको बताउनुभएको छ । पूर्वाधारहरुलाई पूर्णता दिन बाँकी रहेको भन्दै उहाँले खेल या पूर्वाधार निमार्णका लागि नगरपालिकामा आएका प्रस्तावना कार्यान्वन हुन कुनै बाँकी नरहेको बताउनुभयो ।

आफ्नो कार्यकालको अवधिमा नीलकण्ठ हरेक वर्ष विभिन्न सूचाङ्कमा उत्कृष्ट बनेको उहाँको भनाई छ । मेयर ढुङ्गानाले नियमित बजेट बाहेक अरबौं बजेट नीलकण्ठमा ल्याउन सफल भएको भन्दै अझै केहि अधुरा काम भएकोले मेयरमा आफुले फेरि उम्मेदवारी दिने बताउनुभयो ।

यसैगरी सोही कार्यक्रमको अवसरमा ३९ जना खेलाडीलाई डान प्रमाण पत्र प्रदान गरिएको छ । २२ जनालाई प्रथम डान, १० जनालाई दोस्रो डान र ७ जनालाई तेस्रो डानको प्रमाण पत्र प्रदान गरिएको नेपाल तेक्वान्दो संघ धादिङले जनाएको छ । संघका जिल्ला अध्यक्ष प्रदिप गिरीको अध्यक्ष्यतामा भएको कार्यक्रममा नीलकण्ठ नरपालिकाका मेयर ढुङ्गानाको प्रमुख आतिथ्यता रहेको थियो ।