कांग्रेस महाधिवेशन : आज बन्दसत्र, केन्द्रीय कार्यसमिति चयनको चुनावी प्रक्रिया सुरु

काठडौँ, २० असोज

नेपाली कांग्रेसको १५औँ महाधिवेशनअन्तर्गत आज बन्दसत्रसँगै नयाँ केन्द्रीय कार्यसमिति चयनका लागि निर्वाचन प्रक्रिया सुरु हुँदैछ।काठमाडौँको खुलामञ्चमा सोमबार महाधिवेशन उद्घाटन भएको थियो। आज बिहान ९ बजेदेखि खुलामञ्चमै बन्दसत्र सुरु हुने कार्यक्रम रहेको कांग्रेसले जनाएको छ।बन्दसत्रमा पार्टी सभापति गगन थापा र उपसभापति विश्वप्रकाश शर्माले राजनीतिक तथा समसामयिक प्रतिवेदन प्रस्तुत गर्ने कार्यतालिका रहेको छ।

यसैबीच, कांग्रेसको निर्वाचन समितिले नयाँ केन्द्रीय कार्यसमिति चयनका लागि निर्वाचन कार्यतालिका सार्वजनिक गरेको छ। कार्यतालिकाअनुसार आज बेलुकी ५ बजे मतदाता नामावली प्रकाशन गरिनेछ। प्रकाशित मतदाता नामावलीउपर बेलुकी ५ बजेदेखि ६ः३० बजेसम्म दाबीविरोध गर्न सकिनेछ भने बेलुकी ८ः३० बजे मतदाताको अन्तिम नामावली प्रकाशन गरिनेछ।

निर्वाचन कार्यतालिकाअनुसार भोलि बिहान १० बजेदेखि दिउँसो ३ बजेसम्म उम्मेदवारी मनोनयन दर्ता हुनेछ। दिउँसो ४ः३० बजे उम्मेदवारको प्रारम्भिक नामावली प्रकाशन गरिनेछ। त्यसपछि ४ः३० बजेदेखि ५ः३० बजेसम्म उम्मेदवारी दरखास्तउपर दाबीविरोध गर्न सकिनेछ। बेलुकी ७ बजे उम्मेदवारको दोस्रो नामावली प्रकाशन गर्ने कार्यक्रम छ।

त्यस्तै, पर्सि २१ गते बिहान ९ बजेसम्म उम्मेदवारी फिर्ता लिन सकिनेछ। बिहान १० बजे उम्मेदवारको अन्तिम नामावली प्रकाशन गरिनेछ। सोही दिन उम्मेदवारले प्रचारप्रसार गर्न पाउने निर्वाचन समितिले जनाएको छ।कांग्रेसको नयाँ केन्द्रीय कार्यसमिति चयनका लागि असोज २२ गते मतदान हुने भएको छ। निर्वाचन कार्यतालिकाअनुसार बिहान ७ बजेदेखि बेलुकी ५ बजेसम्म मतदान हुनेछ।