पृथ्वी राजमार्गका पाँच स्थानमा पहिरो

धादिङ, ९ असोज : निरन्तर वर्षासँगै ढुङ्गासहितको पहिरो खस्दा पृथ्वी राजमार्गअन्तर्गत धादिङका तीन स्थानमा दुवैतर्फ र दुई स्थानमा एकतर्फी सडक अवरुद्ध भएको छ ।
जिल्ला प्रहरी कार्यालय धादिङका अनुसार आज मध्याह्न १२ बजेसम्म बेनिघाट रोराङ गाउँपालिका–७ कृष्णभिर, वडा नं १० तिग्राङखानी र वडा नं ९ ज्यामिरेघाटमा दुवैतर्फ सडक अवरुद्ध भएको हो ।

कृष्णभिरमा अवरोध हटाउने काम भइरहेका बेला पुनः ढुङ्गा खस्न थालेपछि काम रोकिएको छ । तिग्राङखानी र ज्यामिरेघाटमा पनि माथिबाट ढुङ्गासहित पहिरो खसेर सडक अवरुद्ध भएको छ ।
त्यसैगरी गजुरी गाउँपालिका–२ परेवाभिर र बेनिघाट रोराङ गाउँपालिका–१० ज्वाङखोलामा एकतर्फी सडक अवरुद्ध भएको छ । यी दुवै स्थानमा अवरोध हटाउने काम भइरहेको प्रहरीले जनाएको छ ।

जिल्लामा निरन्तर वर्षा भइरहेको र भारी वर्षाको सम्भावना रहेकाले सडक, मौसम तथा जोखिमको अवस्था बुझेर मात्र यात्रा गर्न प्रहरीले आग्रह गरेको छ ।

जिल्ला प्रशासन कार्यालय धादिङले आज बिहानदेखिनै अर्को सुचना जारी नहुन्जेल सम्म पृथ्वीराजमार्गमा सवारी पुर्णरुपमा रोक लगाएको छ ।