बाढीमा ज्यान गुमाएका सुवेदी र मगर परिवारलाई नीलकण्ठको सहयोग

धादिङ, ७ असोज : नीलकण्ठ नगरपालिकाले भोटेकोशी बाढीमा परी ज्यान गुमाएका परिवारलाई काजकिरिया खर्चबापत आर्थिक सहयोग उपलब्ध गराउने कार्यलाई निरन्तरता दिएको छ ।
बुधबार नगरप्रमुख भीमप्रसाद ढुङ्गानासहितको टोलीले नीलकण्ठ नगरपालिका–९ का सुवेदी परिवार र वडा नं ४ जुरेथुमका ललित सारु मगरका परिवारलाई भेटेर समवेदना व्यक्त गर्दै सहयोग रकम हस्तान्तरण गरेको हो ।

नगरपालिकाका विपद् शाखा प्रमुख अर्जुनकुमार श्रेष्ठका अनुसार हालसम्म ३० जना शोकसन्तप्त परिवारका घरमै पुगेर प्रतिमृतक रु ४० हजारका दरले सहयोग रकम हस्तान्तरण गरिएको छ ।
नगरपालिकाले बाढीमा अभिभावक गुमाएका बालबालिकालाई कक्षा १२ सम्म निःशुल्क पढाउने घोषणासमेत गरिसकेको छ ।

ती बालबालिका हाल अध्ययनरत निजी तथा सामुदायिक विद्यालयमै निःशुल्क पढ्न पाउने व्यवस्था मिलाइएको नगरप्रमुख ढुङ्गानाले बताउनुभयो ।