बाढीपीडितको सहयोगका लागि चिल्ड्रेनपार्क आवासीय माध्यमिक विद्यालयद्वारा शैक्षिक र आर्थिक सहयोगको घोषणा

धादिङ, भदौ १५:

धादिङमा भोटेकोशी तथा त्रिशूली नदीमा आएको विनाशकारी बाढीबाट प्रभावित नागरिकको राहत तथा पुनःस्थापनाका लागि चिल्ड्रेनपार्क आवासीय माध्यमिक विद्यालयले करिब ५ लाख रुपैयाँ सहयोग गर्ने घोषणा गरेको छ। विद्यालयले बाढीका कारण अभिभावक गुमाएर आर्थिक कठिनाइमा परेका धादिङका प्रभावित विद्यार्थीलाई कक्षा १२ सम्म निःशुल्क अध्ययनको व्यवस्था गर्ने निर्णयसमेत गरेको छ।

विद्यालयले राहत तथा पुनःस्थापना कोषका लागि आफ्नै तर्फबाट २ लाख ५५ हजार ५५ रुपैयाँ सहयोग गर्ने भएको छ। त्यस्तै, प्याब्सन तथा अन्य सामाजिक संघसंस्थामार्फत थप १ लाख रुपैयाँ सहयोग उपलब्ध गराइने विद्यालयले जनाएको छ।

यसैगरी, विद्यालयका सम्पूर्ण शिक्षक तथा कर्मचारीको दुई दिनको आधारभूत तलब बराबरको १ लाख ४४ हजार ३ सय २७ रुपैयाँसमेत बाढीपीडितको राहतका लागि प्रधानमन्त्री दैवी प्रकोप उद्धार कोषमा जम्मा गरिने भएको छ।

विद्यालयका अनुसार यी सबै रकम गरी कुल ४ लाख ९९ हजार ३ सय ८२ रुपैयाँ प्रधानमन्त्री दैवी प्रकोप उद्धार कोषमा जम्मा गर्ने निर्णय गरिएको छ।

गत भदौ १० गते रसुवास्थित भोटेकोशी तथा त्रिशूली नदीमा आएको बाढीबाट रसुवा, नुवाकोट, धादिङ, चितवनलगायतका जिल्लामा ठूलो जनधनको क्षति भएको भन्दै विद्यालयले सामाजिक तथा मानवीय दायित्वअन्तर्गत सहयोग घोषणा गरेको हो।

बाढी तथा प्राकृतिक विपद्का कारण बाबुआमा गुमाएर आर्थिक कठिनाइमा परेका धादिङका विद्यार्थीलाई कक्षा १२ सम्म सम्पूर्ण वार्षिक तथा मासिक शुल्क मिनाहा गरी पूर्ण रूपमा निःशुल्क अध्ययनको अवसर प्रदान गरिने विद्यालयले जनाएको छ। यसबाट विपद्का कारण शिक्षा निरन्तरतामा समस्या भोगिरहेका विद्यार्थीलाई राहत पुग्ने अपेक्षा गरिएको छ।

विद्यालयका प्रिन्सिपल षष्टिकुमार श्रेष्ठका अनुसार थप राहत जुटाउन इच्छुक विद्यार्थी तथा अभिभावकबाट संकलन हुने रकमसमेत प्रधानमन्त्री दैवी प्रकोप उद्धार कोषमा जम्मा गरिनेछ।

विद्यालयले बाढीपीडितका लागि आर्थिक सहयोगसँगै प्रभावित विद्यार्थीको शिक्षालाई निरन्तरता दिने निर्णय गरेर विपद्को समयमा शैक्षिक संस्थाको सामाजिक उत्तरदायित्वलाई समेत प्राथमिकतामा राखेको जनाएको छ।