धादिङका बाढी–प्रभावित एकसय परिवारलाई राहत सामाग्री वितरण

धादिङबेंसी, भदौ १४ गते ।
भोटेकोशी तथा त्रिशूली नदीमा आएको बाढीबाट प्रभावितलाई आपत्कालीन राहत सामाग्री वितरण गरिएको छ । धादिङको गल्छी गाउँपालिकामा बाढीका कारण समस्यामा परेका अतिप्रभावित एक सय घरधुरीलाई राहत सामग्री हस्तान्तरण गरिएको हो ।

‘नेपाल फ्लड रेस्पोन्स प्रोग्राम’ (Nepal Flood Response Program) अन्तर्गत गल्छी गाउँपालिकासँगको समन्वय तथा डिसिए नेपाल (DCA Nepal) र एक्सन नेपालको सहकार्यमा राहत वितरण कार्यक्रम गरिएकोे हो ।

राहत स्वरूप प्रत्येक प्रभावित घरधुरीलाई दैनिक उपभोग्य खाद्यान्न सामग्रीहरू प्रदान गरिएको छ । जसअन्तर्गत प्रतिपरिवार १ बोरा चामल, २ लिटर तोरीको तेल, १ पोका नुन, १ प्याकेट मसला, १ प्याकेट बेसार, १ प्याकेट खुर्सानी, ५ प्याकेट सोयाबिन र ५ किलोग्राम दाल वितरण गरिएको छ ।

त्यसैगरी, बाढीबाट प्रभावित घरपरिवार तथा समुदायको अस्थायी व्यवस्थापन र पुनस्थापनाका लागि बेनीघाट रोराङ गाउँपालिकालाई समेत आपत्कालीन आश्रय सामग्री हस्तान्तरण गरिएको छ । सो गाउँपालिकालाई १० थान फेमिली टेन्ट र १५० थान त्रिपाल उपलब्ध गराइएको एक्सन नेपालका कार्यकारी निर्देशक कमलराज ढुङ्गानाले जानकारी दिनुभयो ।

स्थानीय तहसँगको प्रत्यक्ष समन्वयमा प्रदान गरिएको यस राहत सहयोगले विपद्को यस कठिन घडीमा प्रभावित परिवारलाई तत्कालको गुजारा चलाउन र अस्थायी बसोबास व्यवस्थापन गर्न ठूलो राहत पुग्ने ढुङ्गानाले बताउनुभयो ।