खानेपानी योजनाको दिगोपनामा जोड,नीलकण्ठका ८५ प्रतिशतमा एक घर एक धारो

धादिङ,२५ साउन
नीलकण्ठ नगरपालिकाले नगर क्षेत्रका सबै घरधुरीमा स्वच्छ खानेपानीको पहुँच पु¥याउने लक्ष्यसहित ७६ वटा खानेपानी योजना अघि बढाउने तयारी गरेको छ। नगरपालिकाले खानेपानी, सरसफाइ तथा स्वच्छता योजना (वास प्लान) कार्यान्वयन गर्दै नयाँ आयोजना निर्माणसँगै सञ्चालनमा रहेका आयोजनाको मर्मतसम्भार र दिगोपनालाई प्राथमिकता दिएको जनाएको छ। नगर प्रमुख भीमप्रसाद ढुंगानाले नयाँ आयोजना थप्नुभन्दा सञ्चालनमा रहेका आयोजनाको नियमित मर्मतसम्भार र संरक्षणमा जोड दिनुपर्ने बताउनुभयो। उहाँका अनुसार नीलकण्ठका हाल करिब ८० देखि ८५ प्रतिशत घरधुरीमा खानेपानीको पहुँच पुगेको छ। पुराना आयोजनाको प्रभावकारी मर्मतसम्भार गर्न सके पहुँच ९० प्रतिशतभन्दा माथि पु¥याउन सकिने उहाँको भनाइ छ।

नीलकण्ठ नगरपालिका खानेपानी सरसफाई तथा स्वच्छता शाखाको आयोजना र नीलकण्ठ नगरपालिका खानेपानी सरसफाई तथा स्वच्छता व्यवस्थापन बोर्डको प्राविधिक सहयोगमा नगरपालिकाको खानेपानी सरसफाई तथा स्वच्छता योजना बैठकलाई सम्बोधन गर्दै उहाँले खानेपानीलाई पहिलो प्राथमिकतामा राखेर काम गरीरहेको बताउनुभो ।नगरपालिकाले सबै घरधुरीमा खानेपानी पु¥याउने लक्ष्यसहित ७६ आयोजनाको विस्तृत परियोजना प्रतिवेदन (डीपीआर) तयार गरिसकेको छ। ती आयोजनाका लागि करिब २० करोड रुपियाँ स्रोत व्यवस्थापन गर्ने तयारी भइरहेको छ।

नगर प्रमुख ढुंगानाले खानेपानी मौलिक अधिकारका रूपमा स्वीकार गरिए पनि पर्याप्त बजेट विनियोजन नगरी साना–साना बजेटमा बहुवर्षीय आयोजना सञ्चालन गर्ने प्रवृत्तिले समस्या समाधानमा ढिलाइ भइरहेको बताउनुभयो। उहाँले विगतमा सञ्चालन भएका खानेपानी आयोजनाको मर्मतसम्भारमा पर्याप्त लगानी हुन नसकेको उल्लेख गर्दै अहिले नयाँ योजनासँगै पुराना आयोजनाको संरक्षणलाई प्राथमिकता दिनुपर्नेमा जोड दिनुभयो।वास प्लानमा नीलकण्ठका १४ वटै वडाको खानेपानी अवस्था, विद्यमान आयोजना, पहुँच, मर्मतसम्भारको आवश्यकता र आगामी योजनालाई समेटिएको छ। खानेपानीसम्बन्धी कामलाई संस्थागत र दीर्घकालीन बनाउन खानेपानी बोर्डको स्थायित्वमा समेत ध्यान दिइएको नगरपालिकाले जनाएको छ।

नेतृत्व परिवर्तनसँगै खानेपानीसम्बन्धी नीति र संरचना परिवर्तन नहुने दीर्घकालीन व्यवस्था आवश्यक रहेको नगर प्रमुख ढुंगानाले बताउनुभयो। खानेपानीसँगै सरसफाइ र फोहोर व्यवस्थापनलाई पनि समग्र सहरी विकाससँग जोडेर अघि बढाउने नगरपालिकाको योजना छ।आफ्नो कार्यकालको बाँकी समय खानेपानीलगायत अधुरा आयोजना सम्पन्न गर्न उपयोग गर्ने प्रतिबद्धता व्यक्त गर्दै नगर प्रमुख ढुंगानाले पदमा रहे वा नरहे पनि नगरपालिका सबैको साझा भएकाले विकास निर्माणमा जनप्रतिनिधि, कर्मचारी र नागरिकले अपनत्व लिनुपर्ने बताउनुभयो। दुई दिन सम्म सन्चालन भएको बैठकमा खानेपानी तथा ढल व्यवस्थापन विभागमा सिनियर डिभिजन ईन्जिनियर डा.रजित ओझा र ईन्जिनियर निरव बैद्यले सहजिकरण गर्नुभएको थियो ।