नेत्रावतीमा कपाल काट्ने सिपमुलक तालिम सुरु

धादिङबेशी,६ धादिङ । धादिङको नेत्रावती डवजोङ गाउँपालिकामा गरिबी निवारणका लागि लघु उद्यम विकास कार्यक्रम अन्तर्गत कपाल काट्ने सम्बन्धी सीप विकास तालिम सुरु गरिएको छ । स्थानीय स्रोत साधनको सदुपयोग गर्दै युवाहरुलाई स्वरोजगार तथा आत्मनिर्भर बनाउने उद्देश्यले तालिम सञ्चालन गरिएको गाउँपालिकाले जनाएको छ ।

नेत्रावती डवजोङ गाउँपालिका–४ मा सुरु गरिएको तालिमको उद्घाटन गाउँपालिकाका प्रमुख प्रशासकीय अधिकृत शन्देश प्रसाद जोशी र वडा नम्बर ४ का कार्यवाहक वडा अध्यक्ष बुद्धराम तामाङको विशेष उपस्थितिमा गरिएको थियो । कार्यक्रममा बोल्दै प्रमुख प्रशासकीय अधिकृत जोशीले सीपमूलक तालिमले युवाहरुलाई रोजगारीसँग जोड्न महत्वपूर्ण भूमिका खेल्ने बताउनुभयो । उहाँले सिकेको सीपलाई व्यवहारमा उतार्दै आत्मनिर्भर बन्न सहभागीहरुलाई आग्रह गर्नुभयो ।

त्यसैगरी कार्यवाहक वडा अध्यक्ष तामाङले स्थानीय स्तरमै आयआर्जनका अवसर सिर्जना गर्न यस्ता तालिम प्रभावकारी हुने उल्लेख गर्नुभयो । गाउँपालिकाले युवाहरुलाई सीपमार्फत उद्यमशील बनाउन विभिन्न कार्यक्रम सञ्चालन गर्दै आएको पनि उहाँले जानकारी दिनुभयो ।

उद्योग विकास शाखाको आयोजनामा सञ्चालन गरिएको तालिममा वडाभित्रका युवाहरुको सहभागिता रहेको छ । तालिममार्फत सहभागीहरुलाई कपाल काट्ने तथा व्यवसाय सञ्चालनसम्बन्धी आधारभूत ज्ञान र व्यवहारिक सीप प्रदान गरिने आयोजकले जनाएको छ ।