धादिङमा नागरिकलाई सहज सूचना प्रवाहबारे छलफल

धादिङ, बैशाख २१ गते । धादिङमा सरकारी कार्यालयहरूबाट नागरिकले सहज र सर्वसुलभ रूपमा सूचना प्राप्त गर्ने विषयमा सरोकारवालाबीच छलफल गरिएको छ। बागमती प्रदेश सूचना पुनरावेदन समितिका नव नियुक्त अध्यक्ष कृष्णराज अधिकारीसहितको टोलीले प्रमुख जिल्ला अधिकारी विजय राज सुवेदीसँग भेटघाट गर्दै सूचना प्रवाहलाई प्रभावकारी बनाउने, पारदर्शिता अभिवृद्धि गर्ने र सेवाग्राहीलाई सहज जानकारी उपलब्ध गराउने विषयमा केन्द्रित छलफल गरेको हो।

उक्त छलफलमा मानव अधिकार संगठन धादिङका सभापति कृष्ण बहादुर पौडेल र कोषाध्यक्ष बालकृष्ण नेपालीको पनि सहभागिता रहेको थियो। सहभागीहरूले नागरिकको सूचना पहुँच सुनिश्चित गर्न सरकारी निकायहरूबीच समन्वय र उत्तरदायित्व आवश्यक रहेकोमा जोड दिएका थिए।

कार्यक्रममा राष्ट्रिय अनुसन्धान जिल्ला कार्यालय धादिङका अनुसन्धान प्रमुखको समेत उपस्थिति रहेको थियो। यसै क्रममा टोलीले जिल्ला प्रहरी कार्यालय धादिङका सूचना अधिकारी डीएसपी प्रकाश दाहाल तथा जिल्ला अदालत धादिङका सूचना अधिकारी केशब सुवेदी र श्रेस्तेदार राजेन्द्र लुइटेलसँग भेटघाट गरी सूचना प्रवाहलाई थप व्यवस्थित र प्रभावकारी बनाउने विषयमा छलफल गरेको जनाएको छ।

छलफलका क्रममा प्रमुख जिल्ला अधिकारी सुवेदीले सबै सरकारी कार्यालयहरूले दैनिक रूपमा सम्पादन गरेका कार्यहरूको विवरण नियमित रूपमा सार्वजनिक गर्नुपर्नेमा जोड दिएका छन्। यसले पारदर्शिता र जवाफदेहिता अभिवृद्धि हुने विश्वास व्यक्त गरिएको छ।