राष्ट्रपति रनिङ शिल्ड प्रतियोगिताको उपाधि नीलकण्ठ नगरपालिकाले जित्यो

धादिङबेशी, १० बैशाख । धादिङबेसीमा सम्पन्न १५ औं राष्ट्रपति रनिङ शिल्ड प्रतियोगिताको उपाधि नीलकण्ठ नगरपालिकाले हात पारेको छ । नीलकण्ठले २० स्वर्ण ९ रजत ९ कास्य पदकसहित समग्रमा प्रथम स्थान हासिल गर्दै लगातार चौथो पटक १५ औं राष्ट्रपति रनिङ शिल्ड प्रतियोगिताको उपाधि जित्न सफल भएको हो । प्रतियोगितामा रुबीभ्याली गाउँपालिका ९ स्वर्ण २ रजत १ कास्य सहित दोस्रो र गजुरी गाउँपालिका ८ स्वर्ण ९ रजत ७ कास्य सहित तेस्रो स्थान हासिल गर्न सफल भएको छ ।

बैशाख ७ गतेदेखि सुरु भएको प्रतियोगिता बुधबार एक औपचारिक समारोहका बीच समापन गरिएको हो । प्रतियोगितामा ज्वालामुखी गाउँपालिकाले ५ स्वर्ण, थाक्रे गाउँपालिकाले ४ स्वर्ण, त्रिपुरासुन्दरी गाउँपालिकाले ३ स्वर्ण पदक जितेका छन् । गल्छी, सिद्धलेक र धुनिबेसीले समान १–१ स्वर्ण जित्दा नेत्रावती डबजोंग र गंगाजमुना गाउँपालिकाले पनि १–१ स्वर्ण पदक हासिल गरेका छन्। बेनिघाट रोराङ र खनियाबास गाउँपालिकाले भने कास्य पदकमात्र जितेका छन् ।

समापन तथा पुरस्कार वितरण समारोह जिल्ला खेलकुद विकास समिति धादिङका अध्यक्ष प्रतापसिंह तामाङको अध्यक्षतामा सम्पन्न भएको थियो । कार्यक्रममा प्रमुख अतिथिका रूपमा नीलकण्ठ नगरपालिकामा मेयर भीम प्रसाद ढुङ्गाना तथा विशेष अतिथिका रूपमा सिद्धलेक गाउँपालिकाका अध्यक्ष परशुराम खतिवडा र गजुरी गाउँपालिकाका अध्यक्ष गणेशलाल श्रेष्ठ लगायतको उपस्थिति रहेको थियो ।

प्रतियोगितामा जिल्लाका १३ वटै स्थानीय तहबाट छनोट भएका खेलाडी विद्यार्थीहरूको सहभागिता रहेको थियो । यस प्रतियोगिताबाट छनोट भएका खेलाडीहरूले बागमती प्रदेशस्तरीय राष्ट्रपति रनिङ शिल्ड प्रतियोगितामा सहभागिता जनाउने जनाइएको छ ।