नेपाल मानव अधिकार संगठन धादिङको कार्यवाहक सभापतिमा पौडल

धादिङबेशी,८ वैशाख । नेपाल मानव अधिकार संगठन धादिङ शाखामा कार्यवाहक सभापतिको जिम्मेवारी कृष्ण बहादुर पौडेललाई तोकिएको छ । संगठनका सभापति कृष्णराज अधिकारीले आफ्नो कार्यव्यस्तताका कारण संगठनमा नियमित समय दिन नसक्ने जनाउँदै उपसभापति कृष्ण बहादुर पौडेललाई कार्यवाहक सभापतिको जिम्मेवारी प्रदान गर्नु भएको हो ।

सभापतीद्धारा हस्ताक्षरित पत्रअनुसार यहि बैशाख ८ गते आजदेखि लागू हुनेगरी पौडेललाई उक्त जिम्मेवारी दिइएको हो । पत्रमा अधिकारीले संगठनको कामकारबाहीलाई प्रभावकारी रूपमा सञ्चालन गर्न र निरन्तरता दिन यो निर्णय गरिएको उल्लेख गरिएको छ ।

कार्यवाहक सभापतिका रूपमा पौडेलले मानव अधिकारकर्मी तथा नागरिक समाजसँग समन्वय गर्दै संगठनको नियमित गतिविधि अघि बढाउने अपेक्षा गरिएको छ । साथै, संगठनको उद्देश्यअनुसार मानव अधिकारको संरक्षण र प्रवद्र्धनमा सक्रिय भूमिका निर्वाह गर्न पनि अनुरोध गरिएको पत्रमा उल्लेख छ । उपसभापती पौडेल बिगत लामो समयदेखि मानव अधिकार संगठनमा बसी काम गर्दे आउनुभएको थियो ।