धादिङमा लागूऔषध (गाँजा) सहित दुई जना पक्राउ

धादिङबेशी ।  धादिङ जिल्लामा प्रहरीले लागूऔषध (गाँजा) सहित दुई जनालाई पक्राउ गरेको छ । जिल्ला प्रहरी कार्यालय धादिङका अनुसार गजुरी गाउँपालिका–२ रातमाटे स्थित चालिसे–वाल्सिङ भित्रीसडकखण्डमा चेकजाँचका क्रममा करिब ३० किलोग्राम गाँजासहित उनीहरूलाई पक्राउ गरिएको हो ।

पक्राउ पर्नेमा मोटरसाइकलमा सवार गजुरी गाउँपालिका ३ बस्ने सञ्च बहादुर खुलाल तामाङ र सोहि स्थान बस्ने विरेन्द्र रुम्वा तामाङ रहेका छन् । उनीहरूलाई हाल नियन्त्रणमा लिई थप अनुसन्धान अघि बढाइएको प्रहरीले जनाएको छ ।

प्रहरीका अनुसार विशेष सूचनाका आधारमा इलाका प्रहरी कार्यालय गजुरीबाट खटिएको टोलीले सवारी जाँच गर्ने क्रममा उनीहरूलाई रोकेको थियो । बा.प्र.०२–०५३ प ६६९३ र बा ६२ प १२८६ नम्बरका मोटरसाइकलमा सवार उनीहरूले गाँजा ओसारपसार गरिरहेको अवस्थामा फेला पारिएको प्रहरीले जनाएको छ । लागूऔषध नियन्त्रण ऐन, २०३३ बमोजिम मुद्दा दर्ता गरी अनुसन्धान प्रक्रिया अघि बढाइएको जिल्ला प्रहरी कार्यालय धादिङका प्रहरी नायव उपरिक्षक प्रकाश दाहालले जानकारी दिनुभयो ।

जिल्ला प्रहरी कार्यालय धादिङका सूचना अधिकारी प्रहरी नायव उपरिक्षक प्रकाश दाहालले लागूऔषध ओसारपसार तथा कारोबारविरुद्ध प्रहरीको निगरानी कडाइ गरिएको बताउँदै यस्ता गतिविधिमा संलग्न जो–कोहीलाई कानुनी दायरामा ल्याइने बताउनु भएको छ । स्थानीयवासीले पनि पछिल्लो समय सडकखण्डमा चेकजाँच बढाइएकाले अवैध क्रियाकलाप नियन्त्रणमा सहयोग पुगेको प्रतिक्रिया दिएका छन् ।