पशुपालन व्यवस्थापनसम्बन्धी दुईदिने तालिम सम्पन्न

धादिङ, ७ चैत्र । नीलकण्ठ–१२ दामगाडे स्थित पशुपति माध्यमिक विद्यालय परिसरमा दुईदिने पशुपालन व्यवस्थापन तालिम सम्पन्न भएको छ।सूर्योदय साना किसान कृषि सहकारी संस्थाको आयोजनामा भएको तालिम शनिबार सम्पन्न भएको हो ।

तालिममा ३३ जना महिला र ३ जना पुरुष गरी ३६ जनाको सहभागिता रहेको थियो । तालिमको सहजीकरण नीलकण्ठ नगरपालिकाको पशु सेवा शाखाका प्राविधिक काशीराज रेग्मी, सुवास खतिवडा र राजेश कोईरालाले गर्नुभएको थियो ।

तालिममा गोठ व्यवस्थापन, प्रजनन, आहारा व्यवस्थापन, जैविक सुरक्षा तथा रोग–परजीवी नियन्त्रणजस्ता महत्वपूर्ण विषयहरूमा सहभागीलाई जानकारी गराइएको थियो। सहभागीहरूले तालिमबाट प्राप्त ज्ञानले पशुपालन व्यवसायलाई थप व्यवस्थित र उत्पादनमुखी बनाउन सहयोग पुग्ने विश्वास व्यक्त गरेका छन्।

सहकारी संस्थाका अध्यक्ष कपिलदेव सापकोटाको अध्यक्षतामा सम्पन्न तालिममा सहकारीका सञ्चालक समिति सदस्य दयाराम लम्साल, खड्गकुमारी सापकोटा तथा संस्थाका प्रबन्धक ज्ञानु इटनीलगायत कृषकहरुको उपस्थिति रहेको थियो।