नीलकण्ठ–८ मा वडा स्तरीय बालअधिकार समिति गठन

धादिङ, ०४ चैत्र ।
नीलकण्ठ नगरपालिका वडा नं। ८ मा वडा स्तरीय बालअधिकार समिति गठन गरिएको छ। वडा अध्यक्ष प्रकाश कुमार श्रेष्ठको अध्यक्षतामा सम्पन्न कार्यक्रममा विभिन्न सरोकारवाला निकायको सहभागितामा समिति गठन गरिएको हो।

नवगठित समितिको अध्यक्षमा वडाका निर्वाचित जनप्रतिनिधि दुर्गा अधिकारी चयन हुनुभएको छ। समितिमा विभिन्न क्षेत्रको प्रतिनिधित्व रहने गरी अन्य १० जना सदस्य चयन गरिएको छ।

कार्यक्रममा बालमैत्री स्थानीय शासनका ५१ वटा सूचकहरूबारे पनि छलफल गरिएको थियो। उक्त अवसरमा आधारभूत स्वास्थ्य चौकीकी एएनएम लक्ष्मी अधिकारी र वडा सचिव रमेश खनालले विषयवस्तुमाथि सहजीकरण गर्नुभएको थियो।

कार्यक्रमको सञ्चालन नीलकण्ठ नगरपालिका धादिङका स्थानीय बालमैत्री शासन समितिका सहजकर्ता सुवास खतिवडाले गर्नुभएको थियो।

कार्यक्रममा सामाजिक विकास समिति संयोजक मञ्जु मगर, वडाका जनप्रतिनिधि तथा कर्मचारी, आधारभूत स्वास्थ्य संस्थाका कर्मचारी, महिला स्वास्थ्य स्वयंसेविका, चार वटा विद्यालयका बाल संरक्षण शिक्षक, विद्यालय व्यवस्थापन समितिका पदाधिकारी, बाल सञ्जालका प्रतिनिधि, अस्थायी प्रहरी पोस्ट पुच्छर बजारका प्रहरी प्रतिनिधि तथा लक्षित वर्ग समुदायका प्रतिनिधिहरूको उपस्थिति रहेको थियो।