नेत्रावती डबजोङमा नेकपाको २५५ सदस्यीय निर्वाचन परिचालन समिति गठन

धादिङबेशी । नेपाली कम्युनिस्ट पार्टी (नेकपा) धादिङको नेत्रावती डबजोङ गाउँपालिकामा प्रतिनिधिसभा निर्वाचनको तयारीका लागि भेला तथा प्रशिक्षण कार्यक्रम सम्पन्न भएको छ।

सेमजोङ स्थित चौतारा सामुदायिक भवनमा आयोजित कार्यक्रममा आगामी फागुन २१ गते हुने प्रतिनिधिसभा निर्वाचनलाई लक्षित गरी संगठनात्मक तयारी तथा प्रशिक्षण गरिएको हो। भेलाबाट पार्टीका केन्द्रिय सदस्य शङ्कर अधिकारीको संयोजकत्वमा २५५ सदस्यीय निर्वाचन परिचालन समिति गठन गरिएको छ।

गठन गरिएको समितिअन्तर्गत आर्थिक, प्रचार–प्रसार, यातायात, युवा परिचालन, बुथ अनुगमन, जनवर्गीय संगठन परिचालन, कर्मचारी समन्वय, मतदाता शिक्षा तथा प्रशिक्षणलगायत उपसमितिहरू रहने जनाइएको छ।

कार्यक्रममा पार्टीका केन्द्रीय नेता, जिल्ला संयोजकसहितका नेताहरूको उपस्थिति रहेको थियो। सहभागी वक्ताहरूले आगामी निर्वाचनलाई शान्तिपूर्ण र व्यवस्थित बनाउन पार्टी कार्यकर्तालाई जिम्मेवारीपूर्वक परिचालन हुन आग्रह गरेका थिए।

उक्त कार्यक्रममा बोल्दै प्रतिनिधिसभा सदस्यका उम्मेदवार रामबहादुर भण्डारीले नेत्रावती डबजोङ गाउँपालिकामा पर्यटन, कृषि, स्वास्थ्य, शिक्षा र रोजगारीका क्षेत्रमा प्राथमिकताका साथ काम गर्ने प्रतिबद्धता व्यक्त गर्नुभयो। उहाँले जनताको विश्वास र सहयोगका आधारमा विकास निर्माणमा योगदान दिने धारणा राख्नुभयो।

कार्यक्रमकै अवसरमा विभिन्न राजनीतिक दल परित्याग गरी करिब २० जना नेकपामा प्रवेश गरेको आयोजकले जनाएको छ। धादिङ निर्वाचन क्षेत्र नम्बर २ मा यसपटकको प्रतिनिधिसभा निर्वाचनलाई स्थानीयस्तरमा चासोका साथ हेरिएको छ।