उपाध्यक्ष कप महिला भलिबलको उपाधि चौतारा मावि ‘सी’लाई

धादिङ, २७ पुस ।
नेत्रावती डबजोङ गाउँपालिकामा आयोजित प्रथम उपाध्यक्ष कप महिला भलिबल प्रतियोगिताको उपाधि चौतारा माध्यमिक विद्यालय ‘सी’ ले जितेको छ। गाउँपालिका परिसरस्थित खेलमैदानमा सम्पन्न प्रतियोगितामा मार्पाक ‘बी’ उपविजेता तथा चौतारा मावि ‘बी’ तेस्रो स्थान हासिल गर्न सफल भएका छन्।

प्रतियोगितामा प्रथम हुने टोलीलाई नगद ३० हजार रुपैयाँसहित शिल्ड, मेडल र प्रमाणपत्र, दोस्रो हुने टोलीलाई नगद २० हजार रुपैयाँसहित शिल्ड, मेडल र प्रमाणपत्र तथा तेस्रो हुने टोलीलाई नगद १५ हजार रुपैयाँसहित शिल्ड, मेडल र प्रमाणपत्र प्रदान गरिएको थियो।

व्यक्तिगत विधातर्फ चौतारा मावि ‘सी’ की एलिना सुनार उत्कृष्ट खेलाडी घोषित हुनुभयो। यसैगरी मार्पाक ‘ए’ की सुस्मिता रानी घले उत्कृष्ट डिफेन्डर, चौतारा मावि ‘सी’ की एम्बिसा तामाङ उत्कृष्ट लिफ्टर, मार्पाक ‘बी’ की प्रेमैका गुरुङ उत्कृष्ट सर्भर तथा चौतारा मावि ‘बी’ की बिपना तामाङ उत्कृष्ट स्पाइकरका रूपमा सम्मानित हुनुभएको छ।

शुक्रबार सुरु भएको प्रतियोगिता शनिबार सम्पन्न भएको हो। प्रतियोगिताको समापन समारोह गाउँपालिका उपाध्यक्ष सितामाया गुरुङको सभापतित्व तथा गाउँपालिका अध्यक्ष मेघनाथ रिजालको प्रमुख आतिथ्यतामा सम्पन्न भएको थियो।

प्रतियोगितामा गाउँपालिकाभित्रका माध्यमिक विद्यालय, टोल सुधार समिति तथा विभिन्न समूह गरी १० वटा टोलीको सहभागिता रहेको थियो।

समापन समारोहलाई सम्बोधन गर्दै अध्यक्ष मेघनाथ रिजालले प्रतिभाशाली खेलाडीहरूलाई आगामी दिनमा जिल्ला र प्रदेशस्तरीय प्रतियोगितासम्म सहभागी गराउने गरी गाउँपालिकाले टिम निर्माण गर्ने प्रतिबद्धता व्यक्त गर्नुभयो। जित–हारलाई स्वाभाविक प्रक्रिया भन्दै उहाँले खेलाडीहरूलाई आत्मविश्वासका साथ निरन्तर अभ्यास गर्न सुझाव दिनुभयो।

उपाध्यक्ष गुरुङले खेलकुद स्वास्थ्य, राष्ट्रको गौरव र पहिचानसँग जोडिएको विषय भएको उल्लेख गर्दै खेलकुदले समाजमा एकता कायम गर्न, समृद्धिको आधार तयार गर्न तथा शारीरिक र मानसिक स्वास्थ्य मजबुत बनाउन महत्वपूर्ण भूमिका खेल्ने बताउनुभयो।