राजनीति र विचारलाई बाहिरै छोडेर पज्ञा प्रतिष्ठानमा आउन मेयर ढुङ्गानाको आह्वान, नीलकण्ठको पुरानो भवनमा विशाल पुस्तकालय बनाइने उद्घोष

धादिङबेशी,५ पौष । नीलकण्ठ नगरपालिकाका मेयर भीम प्रसाद ढुंगानाले नगरपालिकाको पुरानो भवनलाई व्यवस्थित गरी त्यहाँ एक विशाल र आधुनिक पुस्तकालय स्थापना गरिने घोषणा गर्नुभएको  छ ।

शनिबार सम्पन्न नीलकण्ठ प्रज्ञा प्रतिष्ठानको सभालाई सम्बोधन गर्दै मेयर ढुंगानाले नगरपालिका नयाँ प्रशासनिक भवनमा सरेपछि हालको भवनको तल्लो तल्लालाई पूर्ण रूपमा फर्निसिङ गरी प्रज्ञा प्रतिष्ठान मातहत रहने पुस्तकालय सञ्चालन गरिने जानकारी दिनुभयो ।

सम्बोधनका क्रममा मेयर ढुंगानाले विकास भन्नासाथ सडक र देखिने भौतिक संरचनालाई मात्र बुझ्ने सोच परिवर्तन गर्नुपर्नेमा जोड दिनुभयो। उहाँले भन्नुभयो, “देशको कुल बजेटमा शिक्षाको हिस्सा ११ प्रतिशत मात्रै हुँदा नीलकण्ठ नगरपालिकाले भने ४१ प्रतिशतभन्दा बढी बजेट शिक्षामा लगानी गरेको छ । यसको नतिजा ढिलो देखिए पनि यसले भविष्यमा ठुलो परिवर्तन ल्याउनेछ ।”

मेयर ढुंगानाले नीलकण्ठ प्रज्ञा प्रतिष्ठानलाई अझ साझा र समावेशी बनाउन सुझाव दिनुभयो। हाल ४९ सदस्य रहेको प्रतिष्ठानमा सदस्य संख्या बढाई नीलकण्ठको भूगोलभित्र बसोबास गर्ने अन्य पालिकाका स्रष्टा र प्रतिभालाई समेत समेट्ने गरी विधान संशोधन गर्नुपर्ने उहाँको भनाइ थियो ।

प्रतिष्ठानलाई कला, साहित्य र संस्कृतिको ‘पवित्र मन्दिर’को संज्ञा दिँदै मेयर ढुंगानाले राजनीतिक विचारधारालाई प्रतिष्ठान बाहिरै छोडेर आउन आग्रह गर्नुभयो। उहाँले भन्नुभयो, “मन्दिरमा छिर्दा जुत्ता बाहिरै छोडेजस्तै, प्रतिष्ठानभित्र छिर्दा राजनीति बाहिरै छोड्नुपर्छ।” यसैगरी, नगरपालिकाले विज्ञ भक्त राईमार्फत जातजाति, मठमन्दिर, पौराणिक स्थल तथा कला–संस्कृतिको तथ्याङ्क संकलन गरी प्रतिवेदन तयार गरिसकेको जानकारी दिँदै उक्त अध्ययनलाई आधार मानेर प्रतिष्ठानले थप काम अघि बढाउनुपर्ने मेयरको सुझाव थियो ।

आफ्नो कार्यकालमा गरेका सबै वाचा पूरा गरेको दाबी गर्दै मेयर ढुंगानाले नगरपालिकाको काममा एउटै गल्ती देखाइएमा राजीनामा दिन तयार रहेको समेत बताउनुभयो । साथै, प्रज्ञा प्रतिष्ठानलाई पूर्ण रूपमा स्वायत्त संस्थाका रूपमा अघि बढाइने र नगरपालिकाले कुनै हस्तक्षेप नगर्ने स्पष्ट पार्नुभयो ।

नीलकण्ठ प्रज्ञा–प्रतिष्ठान ऐन–२०७९ अनुसार स्थापना गरिएको प्रतिष्ठानले विगत तीन वर्षदेखि स्थानीय बौद्धिक अभ्यास, सिर्जना तथा ऐतिहासिक सम्पदाको अभिलेखीकरण गर्दै आएको जनाएको छ ।