धादिङमा गाई–भैंसीमा रेबिजको संक्रमण

धादिङ, साउन २२ गते ।
धादिङमा गाई–भैंसीमा रेबिजको संक्रमण देखिन थालेको छ । पछिल्लो समय जिल्लाको नीलकण्ठ नगरपालिका र बेनीघाट रोराङ गाउँपालिकामा किसानहरूले पालेका पशुमा रेबिजको संक्रमण देखिएको पशु सेवा कार्यालय धादिङले जनाएको छ ।

नीलकण्ठ नगरपालिका भित्रका पशुमा परिक्षण गर्दा रेबिज पुष्टि भएको र बेनीघाट रोराङ क्षेत्रमा पनि रेबिजसँग मिल्दोजुल्दो लक्षण देखिएको पशु सेवा कार्यालय धादिङका प्रमुख बबलु ठाकुरले जानकारी दिनुभयो ।

रेबिजको संक्रमण कुकुर मात्र नभई स्याल, न्याउरी मुसा, बिरालो लगायतका जङ्गली जनावरको टोकाइबाट पनि सर्ने भएकाले विशेष सतर्कता अपनाउनुपर्ने बताउनुभयो ।

कार्यलयका प्रमुख ठाकुरले किसानहरूलाई गोठ वरपर तारवार लगाएर जङ्गली जनावर प्रवेश गर्न नदिने, न्याउरी मुसा जस्ता साना प्राणी छिर्न नसक्ने व्यवस्था मिलाउने, तथा गोठको भौतिक र जैविक सुरक्षा मजबुत बनाउन आग्रह गर्नुभएको छ । उहाँले गोठको उचित सुरक्षा गरिएमा रेबिजको संक्रमणबाट गाई–भैंसीजस्ता पशुधनलाई जोगाउन सकिने स्पष्ट पार्नुभयो ।

पशु सेवा कार्यालयले रेबिजको लक्षण देखिएका पशुहरूको दूध बिक्री नगर्न समेत किसानहरूलाई आग्रह गरेको छ । रेबिज नियन्त्रण गर्नको लागि स्थानीय तहहरूले पनि समुदायमा रहेका कुकुरहरूलाई भ्याक्सीनेसन कार्यक्रम संचालन गर्नुपर्ने कार्यालयले जनाएको छ ।