गंगाजमुना–३ मा सरसफाइ तथा फुल रोप्ने कार्यक्रम

धादिङ, ०२ साउन ।
गंगाजमुना गाउँपालिका वडा नं ३ मा सरसफाइ तथा फुल रोप्ने कार्यक्रम सम्पन्न गरिएको छ। साविक गुम्दि गाविस वडा नं २ र ३ को सिंखडा टोलस्थित तल्लो चौतारादेखि वरदन सडक खण्डसम्म सरसफाइ र फुल रोपिएको हो।

वडाको आयोजनामा गरिएको कार्यक्रममा वडाका जनप्रतिनिधि, कर्मचारी, टोल विकास समिति, विभिन्न विद्यालय, स्वास्थ्य संस्था, आमा समूह तथा स्थानीयवासीहरूको सक्रिय सहभागिता रहेको थियो।

वडालाई सुन्दर र हराभरा बनाउने उद्देश्यसहित पहिले सीढी निर्माण गरी त्यसपछि दुबै छेउमा फुल रोपिएको वडाध्यक्ष गुरुङले जानकारी दिनुभयो। उहाँका अनुसार, वडाभरि फुल रोपेर ढकमक्क पार्ने योजना अनुरूप काम अघि बढाइएको हो।

स्थानीय सरोकारवाला र संस्थाहरूको सहकार्यमा गरिएको यस अभियानले समुदायमा सरसफाइ तथा वातावरणीय सौन्दर्यप्रति जनचेतना फैलाउने अपेक्षा गरिएको छ।