बेनीघाट रोराङको कोस्राङ आ.विमा अध्ययनरत विद्यार्थीहरूलाई शैक्षिक सामाग्री वितरण

धादिङ, ०७ असार ।
धादिङको बेनीघाट रोराङ गाउँपालिका–१० स्थित कोस्राङ आधारभूत विद्यालयमा अध्ययनरत विद्यार्थीहरूलाई शैक्षिक सामाग्री वितरण गरिएको छ।

अष्ट्रेलियामा बसोबास गर्ने नेपालीहरूको पहलमा स्थापना भएको समुदाय प्रेरित डिजिटल मिडिया प्लेटफर्म ‘नेपाल ट्युव’को आर्थिक सहयोग तथा सामाजिक संस्था ‘एक्सन नेपाल’को सहजीकरणमा उक्त सामग्री वितरण गरिएको हो । ‘ One in million, लाखौंमा एक’ भन्ने अभियानअन्तर्गत कार्यक्रम सञ्चालन गरिएको हो ।

कोस्राङ विद्यालयमा अध्ययनरत ६३ जना विद्यार्थीलाई झोला, कापी, कलम, पेन्सिल बक्स, कलर, क्याल्कुलेटर लगायतका शैक्षिक सामग्रीहरू प्रदान गरिएको हो। तीमध्ये ५८ जना विद्यार्थी चेपाङ समुदायका छन् भने बाँकी ५ जना अन्य समुदायका हुन्।

विद्यालयका प्रधानाध्यापक सुसील राज गिरीले आर्थिक अभावका कारण अध्ययनमा कठिनाइ खेपिरहेका चेपाङ विद्यार्थीका लागि शैक्षिक सामग्रीले ठूलो राहत पुगेको बताउँदै एक्सन नेपाल र नेपाल ट्युवप्रति आभार व्यक्त गर्नुभयो। उहाँले यस्तो सहयोगले विद्यार्थीको शिक्षामा रुचि बढाउनुका साथै विद्यालय छोड्ने प्रवृत्तिमा कमी आउने विश्वास व्यक्त गर्नुभयो।

कार्यक्रमका अवसरमा एक्सन नेपाल धादिङका कार्यकारी निर्देशक कमलराज ढुंगानाले शैक्षिक सामग्री अभावमा अध्ययनमा समस्या भोगिरहेका विद्यार्थीहरूलाई सहयोग गर्न पाउँदा खुसी लागेको बताउनुभयो। साथै, आगामी दिनहरूमा पनि नेपाल ट्युव र एक्सन नेपालको सहकार्यमा शैक्षिक सहयोगका कार्यक्रम विस्तार गर्दै लैजाने योजना रहेको उहाँले जानकारी दिनुभयो ।