सिद्धलेकले ल्यायो ६० करोडको बजेट,सडक, शिक्षा, कृषि र स्वास्थ्यमा जोड

धादिङबेशी, ५ असार । धादिङको सिद्धलेक गाउँपालिकाले आर्थिक वर्ष २०८२/०८३ का लागि ल्याएको नीति तथा कार्यक्रम र बजेट गाउँसभाबाट सर्वसम्मत रूपमा पारित गरिएको छ।

बिहीबार सम्पन्न गाउँसभाको १७औं अधिवेशनमा अध्यक्ष परशुराम खतिवडाले नीति तथा कार्यक्रम प्रस्तुत गर्नुभएको थियो भने उपाध्यक्ष सविता अर्यालले रु ६० करोड ५७ लाख ८४ हजार ९१४ को बजेट सभा समक्ष पेश गर्नुभएको हो।

आगामी वर्षको बजेटमा सडक, शिक्षा, कृषि र स्वास्थ्यलाई प्राथमिकता दिइएको जनाइएको छ। पालिका अध्यक्ष परशुराम खतिवडाले नीति तथा कार्यक्रम र बजेट सिद्धलेकबासीको चाहना र आवश्यकता अनुरूप तय गरिएको बताउनु भयो ।

उपाध्यक्ष सविता अर्यालले जनप्रतिनिधि र कर्मचारीको समन्वयमा समयमै तयारी थालिएकोले बजेट निर्धारित मिति भन्दा अगावै प्रस्तुत गर्न सम्भव भएको बताउनुभयो।धादिङका १३ स्थानीय तहहरूमध्ये आर्थिक वर्ष २०८२/०८३ का लागि नीति तथा कार्यक्रम र बजेट ल्याउने सिद्धलेक पहिलो स्थानीय तह बनेको हो।

गाउँपालिकाले दिगो, भरपर्दो तथा वातावरणमैत्री पूर्वाधार निर्माणमा जोड दिने,एक वडा एक पर्यटन क्षेत्र निर्माण गरिने,विश्‍वमै दुर्लभ मानिएको काँडे भ्याकुरको प्रवर्धन गने,पालिकालाई मौरी पालनको हबको रुपमा विकास गर्ने जस्ता निति तथा कार्यक्रम ल्याएको हो ।

गाउँ सभाले आर्थिक विधेयक २०८२ तथा विनियोजन बिधेयक २०८२ समेत सर्व सहमती रुपमा पास गरेको छ ।