नीलकण्ठ–७ हिटीमा १५ दिने मौरीपालन सम्बन्धी तालिम सम्पन्न

धादिङ,०३ असार ।
नीलकण्ठ नगरपालिका वडा नं. ७, हिटीमा मौरीपालनसम्बन्धी तालिमको सम्पन्न भएको छ। गृहिणी महिला सशक्तिकरण कार्यक्रम अन्तर्गत संचालित १५ दिने मौरीपालनसम्बन्धी तालिम सम्पन्न भएको हो ।

नीलकण्ठ नगरपालिका वडा नं. ७ का कार्यवाहक अध्यक्ष राजन अधिकारीको अध्यक्षतामा सम्पन्न कार्यक्रमम नगरप्रमुख भीम प्रसाद ढुंगाना को प्रमुख आतिथ्यता, नगर उपप्रमुख दिपक विश्वकर्माको विशेष आतिथ्यता, निमित्त प्रमुख प्रशासकीय अधिकृत विष्णुप्रसाद रिजाल, सामाजिक विकास समिति संयोजक मञ्जु थापा मगर लगायतको आतिथ्यता रहेको थियो।

समापन समारोहमालाई सम्बोधन गर्नुहुँंदै नगरप्रमुख ढुंगानाले तालिममा सहभागी महिलाहरूले प्राप्त ज्ञान र सीपलाई व्यवहारमा उतार्दै नीलकण्ठ–७ लाई मौरीपालनको ‘हब’का रूपमा विकास गर्नुपर्नेमा जोड दिनुभयो । उहाँले भविष्यमा अन्य स्थानका मानिसहरू पनि नीलकण्ठ –७ मा मौरीपालन सिक्न आउने वातावरण निर्माण गर्नुपर्ने धारणा राख्नुभयो।

नगर उपप्रमुख विश्वकर्माले तालिमलाई केवल तालिम लिनको लागिमात्र नभई व्यावसायिक उत्पादनमा रुपान्तरण गर्न आग्रह गर्दै, भविष्यमा कृषि, व्यूटिसियन, सीप विकासजस्ता थप कार्यक्रमहरू पनि ल्याइने जानकारी दिनुभयो। उहाँले महिलाहरूलाई आत्मनिर्भर र उत्पादनमुखी बन्न प्रेरणा दिनुभएको थियो।

बागमती प्रदेश सरकार, सामाजिक विकास मन्त्रालय तथा सामाजिक विकास कार्यालय, गजुरीको सहयोगमा सम्पन्न भएको उक्त तालिमबाट सहभागी महिलाहरूले मौरीपालन सम्बन्धी व्यवहारिक तथा प्राविधिक ज्ञान हासिल गरेका छन्।

स्थानीय स्रोत र सीपको सही प्रयोगमार्फत उद्यमशीलता विकास गर्ने उद्देश्यका साथ सञ्चालित तालिमले महिलाहरूमा आत्मविश्वास बढाउनुका साथै स्वरोजगारमा योगदान पु¥याउने अपेक्षा लिइएको छ।