नेत्रावती डबजोङमा भएको नृत्य प्रतियोगितामा वडा नं १ को समूह प्रथम

धादिङ, २५ फागुन ।
नेत्रावती डबजोङ गाउँपालिकामा ११५ औँ अन्तर्राष्ट्रिय श्रमिक महिला दिवसको अवसरमा आयोजित नृत्य प्रतियोगितामा वडा नं १ को समूहले प्रथम स्थान हासिल गरेको छ।

गाउँपालिकाको महिला विकास शाखाद्वारा आयोजित शुभकामना आदान–प्रदान तथा नृत्य प्रतियोगितामा वडा नं १ को समूह उत्कृष्ट प्रदर्शन गर्दै पहिलो स्थान हासिल गर्न सफल भएको हो। प्रतियोगितामा चौतारा मावि समूहले दोस्रो स्थान, वडा नं २ की निस्मा तामाङले तेस्रो स्थान, र सुनकन्या आमा समूहले चौथो स्थान प्राप्त गरेका छन्।

प्रतियोगितामा प्रथम, द्वितीय, तृतीय, र चौथो स्थान प्राप्त गर्ने सहभागीलाई नगद पुरस्कारसहित प्रमाणपत्र प्रदान गरी सम्मान गरिएको गाउँपालिकाका अधिकृत ज्ञानेन्द्र दाहालले जानकारी दिनुभयो ।

कार्यक्रम गाउँपालिकाका उपाध्यक्ष सिता चोदेनको अध्यक्षतामा भएको कार्यक्रममा गाउँपालिका अध्यक्ष मेघनाथ रिजालको प्रमुख आतिथ्यता रहेको थियो। कार्यक्रममा वडा नं १ का वडा अध्यक्ष ठाकुर गुरुङ, वडा नं ३ का वडा अध्यक्ष सुरेश गुरुङ, कार्यपालिका सदस्यहरू, वडा सदस्यहरू, गाउँपालिकाका कर्मचारी तथा विभिन्न आमा समूहका सदस्यहरूको उल्लेखनीय उपस्थिति रहेको थियो।

उक्त कार्यक्रम श्रमिक महिलाहरूको सम्मान तथा प्रतिभा प्रोत्साहन गर्ने उद्देश्यले आयोजना गरिएको गाउँपालिकाले जनाएको छ ।