खनियावास गाउँपालिकाको दोस्रो गाउँ सभाको छैठौं अधिवेशन सम्पन्न, विभिन्न १४ वटा विधेयकहरू पारित

धादिङ,०७ फागुन ।
खनियावास गाउँपालिकाको दोस्रो गाउँ सभाको छैठौं अधिवेशन सम्पन्न भएको छ । गाउँपालिकाले “समुन्नत खनियावासको आधारः कृषि, पर्यटन र पूर्वाधार“ भन्ने मूल नारासहित दोस्रो गाउँ सभाको छैठौं अधिवेशन सफलतापूर्वक सम्पन्न गरेको हो ।

गाउँपालिकाले कृषि तथा भौतिक पूर्वाधार निर्माणलाई प्राथमिकता दिँदै कार्यक्रम संशोधन गरेको छ। गाउँपालिका अध्यक्ष रणबहादुर तामाङका अनुसार भारतीय दूतावासको सहलगानीमा रु. २ करोड ४९ लाखको स्वास्थ्य संस्था निर्माणका लागि म्याचिङ फण्ड व्यवस्था गरिएको छ।

यसैगरी, लिस्नेखोला–टिका–स्युग झार्लाग खानेपानी योजनामा रु. २ करोड ८४ लाखको सहलगानी, बुदुगिलिन्जो सडक निर्माणमा रु. १ करोड ५७ लाख, मानेचौतारा–चौकीटोल सडकमा रु. १ करोड ३७ लाख, तथा कुरी खानेपानी योजना अन्तर्गत ‘एक घर, एक धारा’ योजनाका लागि रु. ५० लाख विनियोजन गरिएको छ।

गाउँपालिका उपाध्यक्ष सेक्केमान तामाङले संशोधित कार्यक्रम गाउँ सभामा प्रस्तुत गर्नुभएको थियो। उक्त अधिवेशनले खनियावास गाउँपालिका कृषि व्यवसाय प्रवद्र्धन विधेयक, २०७५, खनियावास गाउँपालिका आर्थिक कार्यविधि विधेयक, २०७५, गाउँ विपद् जोखिम न्यूनीकरण तथा व्यवस्थापन विधेयक, २०७५, आर्थिक कार्यविधि नियमित तथा व्यवस्थित गर्न बनेको विधेयक, २०७५, प्रशासकीय कार्यविधि नियमित गर्ने विधेयक, २०७५, सहकारी विधेयक, २०७५, न्यायिक समिति (कार्यविधि) विधेयक, २०७५, खनियावास गाउँपालिका लेखा समितिको कार्यविधि व्यवस्थापन विधेयक, २०७८, साझेदारी कार्यक्रम सञ्चालन तथा व्यवस्थापन सम्बन्धी विधेयक, २०८०, खानेपानी, सरसफाई तथा स्वच्छता सम्बन्धी व्यवस्था गर्न बनेको विधेयक, २०८०, खनियावास सुशासन विधेयक, २०८१, ऐतिहासिक, धार्मिक तथा सांस्कृतिक सम्पदा तथा संस्कृति संरक्षण सम्बन्धी विधेयक, २०८१, संशोधित विपद् व्यवस्थापन सञ्चालन कोष सम्बन्धी कार्यविधि, २०७५, तथा आर्थिक सहायता सम्बन्धी कार्यविधि, २०७९ पारित गरेको छ।

अधिवेशनले गाउँपालिकाको समग्र विकासका लागि महत्वपूर्ण योजनाहरूलाई प्राथमिकता दिँदै विभिन्न विधेयकहरू पारित गरेको छ । जसले स्थानीय स्तरमा सुशासन, पूर्वाधार विकास, तथा सेवा प्रवाहलाई प्रभावकारी बनाउने अपेक्षा गरिएको छ।