धादिङ उद्योग वाणिज्य संघको पहिलो बैठकले नेतृत्व टुंग्यायो

धादिङ, ०६ माघ ।
धादिङ उद्योग वाणिज्य संघको नयाँ कार्यसमितिले पहिलो बैठकमार्फत संघका पदाधिकारीहरूको मनोनयन सम्पन्न गरेको छ। संघका अध्यक्ष रामकुमार डल्लाकोटीको नेतृत्वमा आयोजित बैठकले संघको विधानअनुसार चार उपाध्यक्ष, महासचिव, कोषाध्यक्ष, र सचिव पदमा मनोनयन गरेको हो।

संघको विधानअनुसार अधिवेशनबाट निवर्तमान वरिष्ठ उपाध्यक्ष स्वतः अध्यक्ष बन्ने व्यवस्था छ। गत पौष २६ र २७ गते सम्पन्न अधिवेशनले रामकुमार डल्लाकोटीलाई अध्यक्ष र रोहित भण्डारीलाई वरिष्ठ उपाध्यक्षमा निर्वाचित गरेको थियो। साथै, अधिवेशनमार्फत सदस्यहरू पनि चयन भएका थिए।

आज सम्पन्न कार्यसमितिको बैठकमा निर्वाचित सदस्यहरूबाट विभिन्न पदाधिकारीहरूको जिम्मेवारी तोकिएको छ। उद्योग उपाध्यक्षमा गोविन्द भण्डारी, वाणिज्य उपाध्यक्षमा रमेश ढकाल, वस्तुगत उपाध्यक्षमा विष्णुमणि श्रेष्ठ, र महिला उपाध्यक्षमा रेखा पण्डितलाई मनोनयन गरिएको छ। महासचिवको भूमिकामा तिलक सिंखडा, कोषाध्यक्षमा तिलक प्रसाद ढुङ्गाना, र सचिव पदमा रमेश विश्वकर्मा, तुलसीजंग थापा, र राजकुमार श्रेष्ठ (आरके) नियुक्त भएका छन्।

बैठकमा संघका भावी योजना, कार्यक्रमहरू, र कार्यसमितिको भूमिका तथा जिम्मेवारीबारे विस्तृत छलफल भएको जनाइएको छ। नवगठित कार्यसमितिले व्यवसाय क्षेत्रको समृद्धि र स्थानीय आर्थिक विकासलाई प्राथमिकतामा राख्दै संघको उद्देश्य कार्यान्वयन गर्ने प्रतिबद्धता व्यक्त गरेको छ।
तस्विर : धादिङपोष्ट