धादिङबेशीमा नेपाल मानव अधिकार वर्ष पुस्तकको समीक्षा, ६७ जना पीडित

धादिङ,२६ मंसिर।
अनौपचारिक क्षेत्र सेवा केन्द्र (इन्सेकले प्रकाशन गर्ने नेपाल मानवअधिकार वर्ष पुस्तक २०२५ को पूर्व समीक्षा गरिएको छ । ७६ औँ अन्तराष्ट्रिय मानवअधिकार दिवस अवसरमा जिल्लामो मानव अधिकारको अवस्था र समिक्षा कार्यक्रम गरिएको हो ।

मानव अधिकारको विश्वव्यापी घोषणापत्र, नेपाल पक्ष भएका सन्धी सम्झौता र नेपालको मौलिक हक अनुसार नागरिकले आफ्नो हक अधिकारको प्रत्याभूति गर्न पाउनु पर्ने जिल्ला समन्वय समितिका उपप्रमुख कूलमान विश्वकर्माले बताउनुभयो ।

सबै नागरिकले सामाजिक साँस्कृतिक र वातावरणीय न्याय पाउनुपर्ने र सरकारले पुरा गर्न लाग्नु पर्ने बताउनुहुँदै उपप्रमुख विश्वकर्माले जनताले पेटभरी खान पाउने अधिकारमात्र नभएर सम्मानपूर्वक बाँच्ने अधिकार सुनिश्चित गर्नु पर्ने बताउनुभयो ।

त्यसैगरी कार्यक्रममा सहायक प्रमुख जिल्ला अधिकारी युवराज अर्यालले सरकारले संरक्षण गर्न खोज्दा खोज्दै मानवअधिकार हनन् हुने गरेकोले कमजोरी सच्याएर सरकारी पक्ष अघि बढ्ने बताउनुभयो । उहाँले मौलिक हक मानवअधिकारको रुपमा रहेकोले कानुन बनाएर मानवअधिकारको प्रत्याभुति गर्नु पर्नेमा जोड दिनुभयो।

त्यस्तै मानवअधिकारको संरक्षणमा प्रहरीले काम गरिरहेको जिल्ला प्रहरी कार्यालयका प्रमुख एसपि दिपेन्द्र शाहीले बताउनुभयो । उहाँले मानव अधिकार उल्लङ्घन हुन नदिने प्रतिबद्धता समेत जनाउनुभएको छ ।

कार्यक्रममा गैसस महासंघका अध्यक्ष शालिकराम दुवाडी, दलित सेवा संघका अध्यक्ष श्याम मगराती, महिला मानवअधिकारकर्मी गायत्री खतिवडा लगायतले महिला, दलित, जानजाती जनताको अधिकार सुनिश्चित गरेर मानवअधिकारको रक्षा गर्नु पर्ने बताउनुभएको छ ।

मानवअधिकार वर्ष पुस्तक २०२५ को पूर्वसमीक्षा कार्यक्रममा इन्सेक जिल्ला प्रतिनिधि सीताराम अधिकारीले ६६ वटा घटनामा ६० जना महिला र ७ जना पुरुष पीडित भएको तथ्यांक प्रस्तुत गर्नुभएको थियो ।

वर्षभरीमा धादिङ कारागारमा एक जनाको मृत्यु, हत्या घटनामा ५ जना, एक स्थानहदको घटनामा २ जना, बालिका बलात्कारमा १७ जना बालिका, बालयौन दुरुपयोगमा २ जना, महिला बलात्कार घटनामा १० जना, बलात्कार प्रयास घटनामा २ जना, घरेलु हिंसामा २२ जना, बहुविवाहमा १ जना, बालक अपहरणमा १ जना, आत्महत्या दुरुत्साहनमा २ जना र अपांगता अधिकार उल्लंघनमा १ जना पीडित भएको इन्सेकले प्रस्तुत गरेको प्रतिवेदनमा उल्लेख छ ।