धादिङको धार्मिक तथा पर्यटकिय स्थल गंगाजमुना माईको मेला आज,मुख्यमन्त्री बहादुर सिंह लामा आउदै

धादिङ,२६ कार्तिक

धादिङको धार्मिक तथा पर्यटकिय स्थल गंगाजमुना माईको मेला आजबाट सुरु भएको छ । धादिङको पर्यटकिय तथा धार्मिक गन्तव्य ऐतिहासिक गंगाजमुना माई मेलाको सम्पुर्ण तयारी पुरा भएको गंगाजमुना गाउँपालिकाका उपाध्यक्ष रामेश्वर सिंखडाले बताउनुभयो । साथै मेलाको लागि श्रदालु भक्तजनहरु दर्शन गर्न आउने क्रम जारी रहेको उहाँले बताउनुभयो ।त्यसैगरी मेला अझै आकर्षक र व्यवस्थित बनाउनको लागि शान्ति सुरक्षा, सरसफाइ र आवश्यक सुविधाहरूको व्यवस्थापन गरिएको उपाध्यक्ष सिंखडाको भनाइ छ ।

हरिबोधनी एकादशीको अवसरमा आयोजना गरिएको उक्त मेलामा विभिन्न सांस्कृतिक कार्यक्रम, झाँक्रि नाँच प्रर्दशनी लगायत बिभिन्न राष्ट्रिय, तथा स्थानिय कलाकारहरुको प्रस्तुति हुने उहाँले बताउनुभयो । गंगाजमुना माईमा पुजा आजा गरेमा आफ्नो मनोकामना पुरा हुने र माई स्थानमा रहेको कुकर धारामा नुहाए पछि रोग ब्याध नलाग्ने धार्मिक बिश्वास रहेको छ । मेलामा फुलको डोली लैजाने, बत्ति बाल्ने, परेवा उडाउने, बत्ति बाली जागाराम बस्ने, झाक्रीहरुले भाकल स्वरुप रातभरी ढ्याग्रो बजायर तपस्या गर्ने र भोली पल्ट नुहाएर एकादशी ब्रत बस्ने चलन रहेको उपाध्यक्ष सिंखडाले बताउनुभयो ।

मेलामा बागमती प्रदेशको मुख्यमन्त्री बहादुर सिंह लामाको प्रमुख आतिथ्यता रहने छ । मेलाको अवलोकन तथा पुजा आजा गर्न धादिङ, नुवाकोट, गोरखा लगाएत देशका विभिन्न जिल्लाबाट भक्तजनहरुको आउने गर्दछन् । गंगाजमुना गाउँपालिका नामाकरण भएको गंगाजमुना माई स्थान तथा प्रसिद्ध झरनामा बिगत लामो समय देखि मेला तथा सांस्कृतिक कार्यक्रमहरु हुदै आएको छ ।यस ठाउँमा वर्षैभरि निरन्तर झरिरहने दिदीबहिनी अर्थात् गंगा र जमुना नामका दुई झरना पौराणिक कालदेखि प्रसिद्ध छन् । भगिरथ राजाको तपस्याको प्रभावले ब्रह्माबाट प्राप्त भएकी गंगा पृथ्वीमा ओर्लँदा पृथ्वी भासिने भएपछि महादेवले यसै स्थानमा गंगालाई आफ्नो शिरमा थापेको धार्मिक विश्वास छ । प्रचुर जलभण्डार तथा जडिबुटीका हिसावले महत्वपूर्ण रहेको यो स्थान जानको लागि धादिङबेसीबाट सहज रुपमा सडक मार्गबाट पुग्न सकिन्छ ।