खनियावास–३ बृचेतमा बचत तथा ऋण व्यवस्थापन तालिम

धादिङ,२५ साउन ।
खनियावास गाउँपालिका वडा नं ३ बृचेतमा बचत तथा ऋण व्यवस्थापन तालिम सम्पन्न भएको छ । प्रयास नेपाल धादिङले आड्रा नेपालको साझेदारी तथा खनियावास गाउँपालिकाको समन्वयमा बुधबारदेखि संचालन भएको तालिम आज सम्पन्न भएको हो ।

उत्थानशील जिविकोपार्जन तथा खाद्य सुरक्षा सुढृढिकरण परियोजना कार्यक्रम अन्तरगत गठित समुहका पदाधिकारीहरुको लागि संचालन गरिएको तालिममा २३ जनाको सहभागिता रहेको थियो ।

तालिममा समुहमा बचतको महत्त्व, बचत संकलन, आम्दानी र खर्च अभिलेख, ऋण लगानी ,पासबुक, बचत तथा ऋण परिचालन सम्बन्धि निति , नियम, समुहका पदाधिकारीहरुको काम, कर्तव्य, अधिकार, घुम्ती कोष परिचालन र पुर्व सहकारी शिक्षा लगायतका बिषयमा सन्तोष सत्यालले सहजिकरण गर्नु भएको थियो ।

कार्यक्रममा प्रयास नेपाल धादिङ र आड्रा नेपालको संस्थागत चिनारी र परियोजनाको लक्ष्य, उदेश्य संचालन प्रक्रिया र मुख्य क्रियाकलापहरुको बारेमा प्रयास नेपाल धादिङका पशु स्वास्थ्य प्राविधिक रुपेश तामाङले जानकारी गराउनु भएको थियोे ।

कृषक समुहका सदस्यहरुको क्षमता विकास, जलवायु कृषि तथा पशुपालन सम्बन्धि पाठशाला, समुहमा लैगिक समावेशीकरण प्रबर्द्धन, प्राविधिक ज्ञान, सिप हस्तान्तरण गरी कृषि तथा पशुपालनमा उत्पादन र उत्पादकत्व बृद्धिमा टेवा पुर्याउने उदेश्यले धादिङ जिल्लाका खनियावास र गंगाजमुना गाउँपालिकामा उत्थानशील जिविकोपार्जन तथा खाद्य सुरक्षा सुढृढिकरण परियोजना संचालन गरिएको प्रयास नेपाल धादिङका कार्यकारी निर्देशक दामोदर अर्यालले बताउनु भयो ।

खनियास गाउँपालिकामा ३२ वटा कृषक समुहहरु मार्फत परियोजनाले कृषि तथा पशुपालन, बजारीकरण र लैगिकताको क्षेत्रमा कार्य गरिरहेको बृचेतबाट लक्ष्मी सुनारले जानकारी दिनु भयो ।