धादिङको संल्यानटारमा संचालित निःशुल्क मुटु जाँच शिविर सकियो, ३ सय ३५ जनाले सेवा लिए

धादिङबेशी । धादिङको त्रिपुरासुन्दरी गाउँपालिका स्थित सल्यान्टारमा भएको निःशुल्क मुटु जाँच शिविरमा ३ सय ३५ जनाले सेवा लिएका छन् । नेपाल हृदयरोग निवारण प्रतिष्ठान जिल्ला शाखा धादिङ र त्रिपुरासुन्दरी गाउँपालिकाको आयोजनामा सल्यान्टार स्वास्थ्य केन्द्रमा भएको शिविरमा ३ सय ३५ जनाले सेवा लिएको नेपाल हृदयरोग निवारण प्रतिष्ठान जिल्ला शाखा धादिङका सभापति राजकुमार श्रेष्ठले जानकारी दिनुभयो ।

शिविरमा ३४ जनाको ईको र १ सय ५६ जनाको ईसिजी परिक्षण गराएका छन् । नेपाल हृदयरोग निवारण प्रतिष्ठान बागमति प्रदेश र चितवन शाखाको संयोजन तथा चितवन मुटु अस्पतालको प्राविधिक सहयोगमा मुटुरोग विशेषज्ञ डा. शंकर लौडारीको नेतृत्वमा आएको चिकित्सक टोलीले वीपी जाँच, सुगर परिक्षण, ईसिजी तथा ईको सेवा प्रदान गरेको हो ।

साथै मुटुरोग सम्वन्धमा अन्तरक्रियात्मक सचेतना कार्यक्रम समेत गरिएको श्रेष्ठले बताउनुभयो । आफ्नै ठाउँमा निशुल्क स्वास्थ्य परिक्षण गराउन पाउदा नागरिकहरु खुशी भएका छन् ।