पुर्व जनप्रतिनिधि सम्मान सहित वडा कार्यालयको प्रगती समिक्षा धुवाँकोटमा सम्पन्न

धादिङ्ग,१० चैत ।
नीलकण्ठ नगरपालिका वडा नम्बर १४ को आयोजनामा वडा कार्यालयको प्रगती समिक्षा,अन्तरक्रिया तथा पुर्व जनप्रतिनिधि सम्मान कार्यक्रम सम्पन्न भएको छ । वडा कार्यालयमा शुक्रबार सम्पन्न भएको कार्यक्रममा वडा भित्र भएको कामको समिक्षा सहित वि.स.२०१५ सालपछिका जनप्रतिनिधिहरुलाई सम्मान गरीएको वडा नम्बर १४ का वडा अध्यक्ष नवराज दुवाडीले जानकारी दिनुभयो। आफ्नो कार्याकालयमा भएको कामको समिक्षा तथा आगामी योजनाहरुको विषयमा समेत नागरिकहरुसँग अन्तरक्रिया गरीएको वडा अध्यक्ष दुवाडीले बताउनुभयो ।

वडा अध्यक्ष नवराज दुवाडीको अध्यक्षतामा सम्पन्न भएको कार्यक्रममा नेपाल नगरपालिका संघका केन्द्रिय अध्यक्ष एवं नीलकण्ठ नगरपालिकाका मेयर भीम प्रसाद ढुंगानाको प्रमुख आतिथ्यता रहेको थियो।कार्यक्रममा नीलकण्ठ नगरपालिकाका उप मेयर दिपक विश्वकर्माको विशेष आतिथ्यता रहेको थियो ।वडाको विकासको लागि पुर्व जनप्रतिनिधिहरुको अनुभव लिदै आगामी दिनमा वडाका विकास गर्ने उदेश्यले सम्मान गरीएको दुवाडीले नीलकण्ठ एफएमलाई जानकारी दिनुभयो । कार्यक्रममा बार्षिक रुपमा भएको कामको प्रगती विवरण र स्वास्थ्य,शिक्षा,कृषि,सडक,खानेपानी लगायतको क्षेत्रमा भएका कामहरुको समिक्षा गरीएको छ ।

कार्यक्रममा नीलकण्ठ नगरपालिका वडा नम्बर १४ का पुर्व जनप्रतिनिधिहरु प्रधानपञ्च हेम प्रसाद अधिकारी,उप प्रधानपञ्च हरि प्रसाद अधिकारी,उप प्रधानपञ्च खम्बा तामाङ,पुर्व गाविस अध्यक्ष अब्जनाथ सापकोटा,गाविस उपाध्यक्ष धन बहादुर तामाङ,पुव वडा अध्यक्ष फन्द्रा तामाङ र पुर्व प्रदेश सांसद तथा मन्त्री डा. रामकुमार अधिकारीलाई सम्मान गरीएको छ । उहाँहरुले वडा नम्बर १४ को विकासमा पु्र्याउनु भएको योगदानको उच्च मुल्यांकन गर्दै र आगामी दिनमा पनि सहयोग र सद्भावको अपेक्षा सहित सम्मान गरिएको वडा अध्यक्ष दुवाडीले बताउनुभयो ।